Hirsla, húsmunur

1726

Varðveitt hjá

Skjala- og bókakista Reynistaðaklaustursumboðs. Lengd 148 cm, breidd að ofan 65 cm, að neðan 60 cm, hliðarhæð 75 cm og hæðin um miðjan gafl 80 cm. Af hæðinni er lokið 12 cm að hæð á hlið og 17 cm á gafli. Kistan er úr dökkri eik, með ögn kúpt lok, úr mjög breiðum borðum (39-54 cm breiðum, 3 cm þykkum). Fimm úthöggnar gjarðir úr málmblöndu umlykja kistuna. Gjarðir mynda kross á göflum og fyrir miðjum göflunum eru sverar og sterkar höldur, mjög vandaðar að frágangi öllum, gildar um miðju. Undir gjörðunum er eltiskinn eða sútað skinn til hlífðar viðnum, og saumur er á gjörðunum með kúptum haus. Fyrir miðju framan á lokinu er sívalur málmtindur og er lokinu lyft með honum, lokið er slétt að innan en festur er krókur á öðrum gafli innanverðum til að bera uppi þunga loksins þegar kistan er opnuð. Skráin er stór, margbrotin og vönduð með þremur læsingarjárnum. Við skrána stendur: Anno 1726, og bókstafirnir ECDA, einnig er „rósa útflúr” á henni ofanverðri. Lykillinn er óvenjustór og vandaður, 17 cm langur og haldið er 9 cm breitt. Hann er úr járni með krossskerðingu í miðju skeggi.