Næla, til skrauts

1873 - 1967

Varðveitt hjá

Mjög falleg víravirkisnæla úr silfri. Kóróna efst sem hvílir á víravirkisbekk, og niður úr honum hanga tveir hringir með fjögrablaða rósum í miðju og eins rósir ganga niður úr miðjum bekknum. Þær eru fjórar og ganga niður úr þessum rósabekk og síðan gengur stærri hringur niður úr honum með samskonar rós í miðju. Síðan er eitt lauf niður úr þessum hring. Þessa nælu gerði Erlingur Filippusson grasalæknir, bóndi og silfursmiður sem lauk búfræðinámi frá Eiðaskóla. Hann var fæddur 13.12.1873 og dó 25.01.1967. Kona Erlings var Kristín Jónsdóttir frá Gilsárvöllum í Borgarfirði eystri. Erlingur gaf dóttur sinni Gunnþórunni, móður Kristínar Sveinbjörgu, næluna þegar Kristín dó. Kristín Sveinbjörg var skírð yfir kistu Kristínar ömmu sinnar. Nælan er líklega festar- eða brúðargjöf sem Erlingur smíðaði handa Kristínu. Erlingur lærði silfursmíði af föður sínum Filippusi Stefánssyni í Kálfafellskoti.