Bakarí, byggingin

01.01.1890 - 01.01.1907

Varðveitt hjá

Ísafjarðarkaupstaður. Aðalstræti 24a á Ísafirði. Var rifið eftir að hafa stórskemmst í bruna þegar Aðalstræti 24 brann árið 1918. Sést í gamla barnaskólann lengst til vinstri, reistur 1875. Svæði þar sem nú er svonefnt Silfurtorg. „Þetta er hins vegar stórmerkilegt hús og á þessum tíma í eigu Th. Thorsteinssonar þar sem Löve hefur væntanlega búið. Húsið byggði Ásgeir Ásgeirsson Johnsen verslunarmaður árið 1852 en honum farnaðist hvorki vel kaupmennska né útgerð og var bú hans tekið til gjaldþrotaskipta þegar hann lézt árið 1860. Sigfús Pálsson snikkari keypti fasteignir Ásgeirs, en þær voru íbúðar- og verzlunarhús úr timbri og vörugeymsluhús Pollmegin. Einnig pakkhús, með skúr, bræðsluhús með innmúruðum pottum og hjallur liggjandi Sundamegin. Sigfús bjó þarna 1866, ásamt konu sinni, Guðrúnu Ingibjörgu Björnsdóttur. Hann dó fáum árum síðar og 1869 seldi ekkja hans Þorsteini Thorsteinssyni bakara eignirnar. Haustið 1888 tók Th. Thorsteinsson sér far til útlanda en til skipsins spurðist aldrei framar. Árið 1895 seldi ekkja hans, Amalie Thorsteinsson, eignirnar Finni Thordarsyni verslunarmanni og var þar helst talið upp íveruhús með bakaríi, geymsluskúr, heyskúr, langskúr og gaflskúr og geymsluhús á bólverki við Pollinn. Árið 1904 hófst Finnur handa við að byggja nýtt hús og segir blaðið Vestri svo frá: „F. Thordarson kaupm. er farinn að láta grafa kjallara undir stórt hús fram af íbúðarhúsi sínu við götuna.“ Þetta var stórt og reisulegt hús en brann til grunna 2. september 1918, þá í eigu Elíasar Pálssonar og Jóns Edvald. Nálæg hús voru í mikilli hættu en það tókst að forða því að þau yrðu eldinum að bráð. Þó ekki alveg því þótt gamla húsinu ofan við Thordarson-húsið yrði með naumindum bjargað frá að brenna að fullu var það stórskemmt. Í fréttum kemur fram að nýja húsið var Aðalstræti 24 en gamla húsið Aðalstræti 24a, ávallt kallað Gamla bakaríið (hljómar kunnuglega J). Þegar eldsvoðinn verður var bakaríið hins vegar í kjallara nýja hússins eða eins og segir í fréttum: „Í kjallaranum var brauðgerð Helga Eiríkssonar. Þar var mjölvara nokkur, brauðgerðinni tilheyrandi og allmikið af vörum Landsverslunarinnar.“ (GMH 2016)