Efnaskipti
= 1967, Arnar Herbertsson

Varðveitt hjá
Nýlistasafnið
Siglfirðingurinn Arnar Herbertsson stundaði nám við Myndlistarskólann í Reykjavík frá 1959 - 1967, og grafík nám hjá Einari Hákonarsyni árið 1970. Fyrstu einkasýningu sína hélt hann í Ásmundarsal, árið 1967, en frá 1969 tók hann þátt í nær öllum samsýningum SÚM, bæði heima og erlendis. Arnar stóð á mörkum tveggja tíma á 7. og 8. áratugnum. Í myndum hans, sem yfirleitt voru smáar og fíngerðar, fléttuðust saman súrrealismi, oplist og popp. Slíkar áherslur voru andsvar hans og annarra listamanna af sömu kynslóð gegn abstraktlistinni, sem veitti ungum listamönnum ekki lengur fersk svör við kalli tímans. Krafa dagsins var að listin stigi niður úr fílabeinsturni sínum og gæfi sig á vald alþýðlegri tilraunum, s.s líflegu listaspili úr heimi tísku og auglýsingagerðar. Skilin milli málverka og lágmynda urðu óskýr og efniviður, sem hingað til þótti óhæfur varð nú fyllilega gjaldgengur. Þannig má sjá togast á skarpar andstæður blárra og bleikra lita sem bylgjast á tilklipptum pappír felldum undir plexígler. Glerið hvíli yfir himinblárri grunnplötunni en djúpt undir litamynstrinu sést í greinar og gróður. Á glerplötuna er málað skráargat líkt og ýjað væri að skáp inn í óræða gróðurveröld. Með svo margháttaðri merkingu og misvísandi efnistökum er verk Arnars Herbertssonar í senn líflegt og léttleikandi, eins og sjá má á yfirborðinu, en dulúðugt og jafnvel eilítið drungalegt undir niðri. Box Art var sú súrrealíska tegund listar kölluð þar sem fundnu dóti var komið fyrir í sýningarkassa eða á brúðuleiksviði til að vekja mótsagnakennd hugrenningartengsl hjá áhorfendum (texti frá frá safneignarsýningu).
Kassi gerður úr við og plexígleri festur á mdf-plötu; platan er blá og kassinn að utan einnig. Inni í kassanum má sjá abstraktform úr viði og efni sem líkist þornuðu lími. Málningin er mögulega akrýl, olía og sprey. Kassinn er festur á plötuna með tveimur skrúfum á mdf-plötu.
Aðrar upplýsingar
Titill
Verkheiti: Efnaskipti
Ártal
= 1967
Safnnúmer
Safnnúmer A: N-152
Stærð
26 x 25 x 0 cm
Aðfangategund
Undirskrár
Undirskrá: Aðalskrá
Flokkun
Útgáfa / Sería
1 / 1
