Nýlistasafnið

Nýlistasafnið (Nýló) var stofnað árið 1978 af hópi listamanna með það markmið að skrá og varðveita framúrstefnulega myndlist og tilraunakennda list, sem þá var að mestu hunsuð af opinberum stofnunum. Þremur árum síðar, árið 1981, var sýningarsalur safnsins opnaður. Frá upphafi hefur Nýló verið rekið af listamönnum, og starfsemi þess mótuð af stjórn sem kjörin er árlega. Í dag er safnið eitt elsta listamannarekna sýningarrými í Evrópu og viðurkennt af safnaráði Íslands. Safnið starfar nú á tveimur stöðum: sýningarrými þess er staðsett í Marshallhúsinu, Grandagarði 20, þar sem skapast hefur vettvangur fyrir gagnrýna umræðu í gegnum sýningar og viðburði. Auk þess hýsir Völvufell 13–21 í Breiðholti safneign og rannsóknaraðstöðu safnsins sem er skrásetningar- og rannsóknarmiðstöð síbreytilegs landslaga íslenskrar myndlistar. Safneign Nýló er alfarið byggð á gjöfum en hún geymir yfir 3.000 verk eftir bæði íslenska og erlenda listamenn frá miðri 20. öldinni til dagsins í dag; þar meðtalin eru verk eftir marga af helstu listamönnum íslenskrar listasögu. Safnið hýsir einnig skjalasafn um listamannareknar stofnanir á Íslandi, þar sem saga virkra og horfinna rýma er skráð og varðveitt. Auk þess heldur Nýló einnig utan um gjörninga arkív ,sem tekst á við það krefjandi verkefni að skrásetja og varðveita hverfula gjörningalist, listform sem Nýló átti stóran þátt í að móta á níunda áratugnum. Safneignin og skjalasafnið í Völvufelli eru aðgengileg fræðimönnum, listamönnum og almenningi eftir samkomulagi. Vinsamlegast hafið samband beint við safnið til að bóka heimsókn eða til að fá nánari upplýsingar.