Möttull

1904 - 1910
 Möttull úr bláu flaueli og með jöðrum er hvítur skinnkantur með svörtum dröfnum á (hreysikattarskinn?). Möttullinn er 140 cm síður, fóðraður með bláu lérefti, fremur grófu. Hann er kræktur að framan með tveimur krókapörum en auk þess eru þar festar möttulspennur úr gylltu silfri, verkið er kornsett víravirki. Á milli þeirra festist önnur spenna (skjöldur) sem krækist í öðrum megin, en hinum megin virðist spennan eitthvað hafa skaddast svo hún er laus frá. Þessi skjöldur fyrir miðju er einnig með víravirki, loftverki, skreytt blómum úr grænum, rauðum og fjólubláum steinum. Spennan virðist óstimpluð. Möttullinn hefur upplitast mikið svo flauelið virðist nú vera grænblátt. Víða má þó sjá að upphaflega hefur hann verið heiðblár. Sjá má að skinnkanturinn að neðanverðu hefur um tíma verið mun breiðari en hann er nú. Einhverjar smávægilegar skemmdir og saumsprettur eru á möttlinum. Gripirnir nr. Þjms. 2012-13 koma frá Ragnheiði Hafstein Reynisdóttur. Þetta er skautbúningur Ragnheiðar Hafstein (Stefánsdóttur Thordersen), eiginkonu Hannesar Hafstein ráðherra: 2012-13-1 skauttreyja 2012-13-2 pils 2012-13-3 möttull 2012-13-4 faldur 2012-13-5 blæja 2012-13-6 peysubrjóst 2012-13-7 stokkabelti 2012-13-8 spöng 2012-13-9 askja Ragnheiður Hafstein ráðherrafrú var langamma gefanda. Búningurinn hefur síðan verið í eigu Ragnheiða í þessum legg fjölskyldunnar. Ragnheiður Thorarensen (Hafstein. f. 1903) eignaðist búninginn eftir móður sína. Síðar gekk búningurinn til gefanda sem nú ákvað að afhenda hann Þjóðminjasafninu til eignar og varðveislu. Í Ljósmyndasafni Íslands í Þjóðminjasafni eru varðveittar ljósmyndir af Ragnheiði Hafstein ráðherrafrú í búningnum, sjá t.d. ljósmyndir nr. P.Br. 25050, 25104, 25105, 25106. Gefandi afhenti ennfremur útsaumað veggtjald sem langamma gefanda, Alma Clara Margrethe Thorarensen (fædd Schiöth), saumaði  (Þjms. 2012-13-10).

Aðrar upplýsingar

Ártal
1904 - 1910
Safnnúmer
Safnnúmer B: 2012-13-3
Stærð
140 x 0 cm Lengd: 140 cm
Aðfangategund
Undirskrár
Undirskrá: Munasafn
Efnisorð / Heiti
Efnisorð: Möttull