Blekstæði
1919
Varðveitt hjá
Þjóðminjasafn Íslands
Blekstæði úr svörtu, póleruðu íbenholti, smíðað og útskorið af Ríkarði Jónssyni myndhöggvara. Borðplatan er með útskornum krákustígs-bekkjum að framanverðu og á endunum; og í hana að framan er felld ofurlítil skúffa, fyrir penna og frímerki, svo haglega að varla sést, er hún 1 cm að hæð, hólfuð sundur í miðju; fremri kantur hennar er 9 cm að lengd, stærð er 8 x 8 cm. Stærð plötunnar er 24 x 15 cm, þykkt 3 cm. Stendur blekbyttan á miðri lengd hennar og er greypt niður í hana. Sitt hvoru megin við blekbyttuna eru skornir niður sporöskjulagaðir reitir og í þeim upphleyptir slönguútskurður. Framan við hana er aflöng gróp eða skál fyrir pennastangir. Tvær samhliða rákir eru skornar í ytri kantinn að framanverðu og á báðum endum og eins milli blekbyttunnar og skriffæraskálarinnar. Bakstykkið er fellt inn í plötuna að aftan og rís það lóðrétt upp frá eftri kanti hennar, en er ekki jafnbreitt og lengd hennar öll. Er það sett saman úr tveimur uppstöndurum, sem fjöl er greypt í; efst mynda þeir einskonar húna, sem standa 3,4 cm upp fyrir bakfjölina, og er útskurður framan á þeim; eftir þeim endilöngum að framanverðu er og útskorin krákustígslína.
Áletrun er í tveimur línum efst og neðst og áframhald hennar á loki blekbyttunnar, skorin með höfðaletri: "Magnús Helgason / frá nemendum / Kennaraskólans" (síðasta línan skorin í hring á lok blekbyttunnar). Bakstykkið allt er 20 x 15 cm að stærð, hæð uppstandara frá kanti 15,6, breidd 2,1 og þykkt 1,5 cm. Í bakfjölina miðja er felld átthyrnd fílabeinsplata, gagnskorin, lengd 8,8, breidd 5,7 cm. Á henni er mynd af sveitabæ og kirkju, en tré og lágt, keilumyndað fjall í bakgrunni, fremst til hægri er upphleypt mynd af skeggjuðum, síðhærðum manni, sem leggur vinstri hönd yfir öxl unglings, sem hjá honum stendur, en bendir á turn kirkjunnar með hinni. Stafirnir R.J. eru á neðri kanti. Blekbyttan er kringlótt, rennd mað rákum allt í kring. Hæð undir lok 2,5 cm, þvermál 7 cm, en þvermál opsins 2,2 cm, gler innaní, hæð með loki 4,5 cm. Lokið er kúpt, utan um það liggur krákustígsbekkur, en ofan á því er áletrun, eins og áður segir. Ofan í miðju þess er greypt kringlótt fílabeinsplata, gagnskorin með ártalinu 1919, stafirnir haglega dregnir saman. Undir stæðinu eru fjórir fætur úr fílabeinu, kantaðir að framan, en bogadregnir að aftan, hæð 1,5, breidd 1,5 cm. Stafirnir R.J. eru krotaðir neðan á plötuna.
Aðrar upplýsingar
Ártal
1919
Efni
Safnnúmer
Safnnúmer A: L-56
Stærð
24 x 15 x 3 cm
Lengd: 24 Breidd: 15 Hæð: 3 cm
Aðfangategund
Undirskrár
Undirskrá: Listiðnaðarsafn (L)
Efnisorð / Heiti
Efnisorð: Blekstæði