Smjörkúpa
1835 - 1855
Varðveitt hjá
Þjóðminjasafn Íslands
Smjörkúpa, upphaflega úr búi Jóns
Sigurðssonar „forseta“. Hún er úr hvítu gleri með skrautgyllingu með
börmum og á haldi. Kúpan stendur á undirskál (17 cm í þvm.) með gylltri
skrautrós á miðjum botni. Kúpan sjálf er 12,2 cm í þvermál, nokkuð bumbulaga,
og 5,6 cm há. Á kúpunni er lok og upp úr því gengur hald með gyllingu á,
í laginu eins og toppur á akarni. Kúpan er í góðu ástandi þótt gylling
sé orðin nokkuð máð og örlítið hafi kvarnast úr barmi sjálfrar kúpunnar
á tveimur stöðum. Frá Jóni forseta fór kúpan til Jens Sigurðssonar bróður
hans, rektors Lærða skólans. Síðan hefur hún gengið frá föður til sonar.
Gefandi, Jón Sigurðsson viðskiptafræðingur (f. 1954) sendi svohljóðandi
gjafabréf með smjörkúpunni (geymt með fylgiskjölum aðfangabókar):
„Gjöf til Þjóðminjasafns Íslands
SMJÖRKÚPA JÓNS SIGURÐSSONAR FORSETA
Smjörkúpa í eigu Jóns Sigurðssonar
forseta (f. 1811 - d. 1879).
Smjörkúpan hefur verið í eigu eftirtalinna
aðila:
1. Jens Sigurðsson, rektor (f.
1813 - d. 1872), bróðir Jóns Sigurðssonar
2. Sigurður Jensson, prófastur
(f. 1853 - d 1924), sonur Jens Sigurðssonar
3. Jón Sigurðsson, raffræðingur
(f. 1925 - d 1928), sonur Sigurðar Jenssonar
4. Sigurður Jónsson, lyfjafræðingur
(f. 1925 - d. 2005), sonur Jóns Sigurðssonar
5. Jón Sigurðsson, viðskiptafræðingur
(f. 1954), sonur Sigurðar Jónssonar
Reykjavík, 28. ágúst 2009
Jón Sigurðsson“
Smjörkúpan hefur lengi verið í
vörslu móður gefanda, Guðlaugar Ágústu Hannesdóttur (f. 1926) (allt frá
því eiginmaður hennar, faðir gefanda, eignaðist kúpuna). Hún afhenti safninu
kúpuna fyrir hönd sonar síns. Lilja Árnadóttir, fagstjóri munasafns Þjóðminjasafnsins
sótti kúpuna til hennar 9. nóvember 2009.
Aðrar upplýsingar
Ártal
1835 - 1855
Efni
Safnnúmer
Safnnúmer A: JS-230
Stærð
17 x 12.4 x 0 cm
Lengd: 17 Breidd: 12.4 Hæð: 0 cm
Aðfangategund
Undirskrár
Undirskrá: Jón Sigurðsson_Safn (JS)
Efnisorð / Heiti
Efnisorð: Smjörkúpa