Panta mynd Notkunarskilmálar

Brennivínsmál

1857

Varðveitt hjá

Þjóðminjasafn Íslands

Brennivínsmál frá Lefolii-verzlun á Eyrarbakka. Úr kopar, sívalt. Hæð 21.5 sm, þvermál botns að utan 8 sm, þvermál að ofan 8.8 sm (rönd á barmi). Þykkt veggjarins 0.2 sm. Á málinu er stórt handfang, einnig úr kopar, að mestu beint og breiðast í miðju, en mjókkar og bognar til endanna. Það er fest með tveimur koparnöglum að ofan, einum að neðan. Á barmröndinni er stafurinn K (upphafsstafur), eins og þrykktur í málminn og yfir honum sams konar skeifumynduð punktaröð. Situr spanskgræna í hvoru tveggja. Þétt við efri hluta handfangsins, vinstra megin, er sporöskjulaga lægð, og í henni upphleypt merki, þrír turnar, en undir turnunum tölustafirnir 182, einnig upphleyptir, fjórði stafurinn er útmáður, þannig að ártal þetta er ekki læsilegt til enda. Hægra megin við efri hluta handfangsins nokkru lengra, eru þrjú samhliða merki. Fyrst sams konar sporöskjulægð (?), með upphleyptri púnktaröð meðfram allri brúninni að innan. Hún umlykur upphleypt merki, sem ekki er auðhlaupið að lesa úr, en yfir því er kóróna. Hálfum sm lengra til hægri er ártalið 1857. Það er þrykkt í flötinn og snýr lóðrétt við barminum. Hálfum sm lengra enn er sporöskjulægð með púnktalínu meðfram brún að innan og eru púnktarnir lægri en sporöskjuflöturinn. Þeir umlykja þrjá upphleypta turna á þverrákóttum grunni. Þriggja turna merkið táknar Kaupmannahöfn á dönskum gull- og silfurmunum, og einnig í koparsmíð. Fáeinir spanskgrænublettir eru á yfirborðinu hér og hvar, t.d. í merkjunum, sums staðar eru dældir og rispur, en að öðru leyti er málið óskemmt. Það er yfirleitt gljáandi fagurt að utan en hrjúft og með dökkum spanskgrænulit að innan. Mál þetta var í eigu föður gefanda, Lofts Arasonar á Eyrarbakka.