Syrpa af úrvals spilum

1955 - 1965

Varðveitt hjá

Íslensk borðspil, nokkur spil saman í kassa. Á kassanum, sem er í íslensku fánalitunum, stendur: SYRPA AF ÚRVALS SPILUM 8 SPIL Í KASSA LÚDÓ MILLA REFSKÁK HÉRAVEIÐAR SLÖNGU SPIL FÓTBOLTA SPIL KAPPREIÐAR SPIL MEÐ HINDRUNUM DERBY VEÐHLAUPA SPIL Í kassanum eru 8 spilaborð úr pappa, eitt fyrir hvert spil. Leikreglur fylgja með á tveimur blöðum (engar leikreglur eru fyrir síðast talda spilið, en leiðbeiningar um gildi á teningnum í því spili er að finna á spilaborði slönguspilsins). Einnig fylgir grænn teningur úr plasti, 19 spilatöflur úr plasti (3 gular, 3 rauðar, 6 grænar og 7 svartar, einhverjar gæti vantað), og einskonar „teningur“ úr hvítu og grænu plasti, sem er í raun skopparakringla sem sérstaklega er ætluð fyrir Derby veðhlaupaspilið. Spilin og umbúðirnar eru öll í prýðilegu ástandi og virðast lítið hafa verið notuð. Í spilakassanum var einnig mikill fjöldi frímerkja frá 1965 en ákveðið var að skrá þau á sérstakt númer þar sem þau auðsjáanlega eru ekki hluti af spilinu (sjá Þjms. 2010-32-31). Gripirnir nr. Þjms. 2010-32 eru allir úr búi Jóhanns Hákonarsonar bifreiðastjóra (f. 1919, d. 1980) og Ragnhildar Sigurðardóttur húsmóður (f. 1921, d. 2008) sem bjuggu í Eskihlíð 13 í Reykjavík. Það var dóttir þeirra, Grímheiður Freyja Jóhannsdóttir, og bræður hennar sem afhentu gripina til safnsins, úr dánarbúi foreldra sinna. Freyja Hlíðkvist Ómarsdóttir og Lilja Árnadóttir, starfsmenn í munasafni Þjóðminjasafnsins, sóttu gripina á heimili þeirra Jóhanns og Ragnhildar í Eskihlíð 13. Einnig voru nokkrar ljósmyndir úr dánarbúi þeirra sem skráðar voru í Ljósmyndasafn Íslands.