Til baka í leit
Veistu meira?

Ljósalampi, til lækninga

Varðveitt hjá
Þjóðminjasafn Íslands
Ljósalampi til andlitsbaða, ýmist til heilsubótar, þegar ljósaböð voru talin til heilsubótar fyrir þá sem fölir þóttu á hörund, eða til fegrunar. Þessi lampi er ætlaður til heimilisnota og er af gerðinni RoRo. Þetta er plastbox sem lampinn sjálfur leggst inn í þegar lokað er, en þegar lampinn er notaður er neðri hluti lampans dreginn fram og honum tyllt við brún að neðan. Helst hann þá, eilítið hallandi. Á lampanum er rofi þar sem hægt er að stilla á milli UV og IR. Snúru er stungið í hlið lampans og hinn endi hennar tengdur við rafmagnsinnstungu. Í plastboxinu er ennfremur plasthlíf með spegli og þar einnig hólf fyrir ljósalampagleraugu. Lampinn og snúran eru í upprunalegum kassa úr bylgjupappa. Lampinn virðist í góðu ástandi. Í kassanum voru einnig fjögur ljósalampagleraugu (þjms. 2010-32-4, 5, 6, 7) en óvíst er að nokkur þeirra séu þau sem upprunalega hafa fylgt lampanum. Tvenn gleraugun eru úr svörtu plasti með hlífðarsvampi á en svampurinn hefur mjög svo morknað af öðrum gleraugunum. Hin tvö gleraugun eru með svörtu gleri í málmumgjörð og svörtu leðri í kring (eins konar grímu). Í öðrum þeirra hefur hægra glerið sprungið. Öll gleraugun eru með svörtum teygjum til að spenna aftur fyrir höfuð til að halda gleraugunum á sínum stað. Gripirnir nr. Þjms. 2010-32 eru allir úr búi Jóhanns Hákonarsonar bifreiðastjóra (f. 1919, d. 1980) og Ragnhildar Sigurðardóttur húsmóður (f. 1921, d. 2008) sem bjuggu í Eskihlíð 13 í Reykjavík. Það var dóttir þeirra, Grímheiður Freyja Jóhannsdóttir, og bræður hennar sem afhentu gripina til safnsins, úr dánarbúi foreldra sinna. Freyja Hlíðkvist Ómarsdóttir og Lilja Árnadóttir, starfsmenn í munasafni Þjóðminjasafnsins, sóttu gripina á heimili þeirra Jóhanns og Ragnhildar í Eskihlíð 13. Einnig voru nokkrar ljósmyndir úr dánarbúi þeirra sem skráðar voru í Ljósmyndasafn Íslands.

Aðrar upplýsingar

Efni
Safnnúmer
Safnnúmer B: 2010-32-3
Stærð
27 x 18.5 x 23 cm Lengd: 27 Breidd: 18.5 Hæð: 23 cm
Staður
Staður: Eskihlíð 13, 105-Reykjavík, Reykjavíkurborg
Aðfangategund
Undirskrár
Undirskrá: Munasafn
Efnisorð / Heiti

Upprunastaður

64°8'5.9"N 21°55'5.8"W