Rafmagnsrakvél

1951

Varðveitt hjá

Rafmagnsrakvél frá PHILIPS, af gerðinni PHILIPSHAVE 7743. Þessi gerð rakvéla var hönnuð af Raymond Loewy og var kynnt á markaðnum árið 1951. Rakvélin er úr beinhvítu plasti (plasthulstur utanum mótorinn) og með tveimur raksturshausum, hringlaga. Árið 1948 hafði eldri gerð komið á markaðinn og var hún mjög áþekk þessari en einungis með einum raksturshaus. Upphaflega hefur fylgt hlíf til að setja yfir raksturshnífana úr krómuðum málmi en hún er nú glötuð. Rakvélin er í upprunalegri tösku úr brúnu leðri með rennilás. Hún er fóðruð að innan og með gylltu merki framleiðandans. Rakvélin er framleidd í Hollandi. Á innstungunni er hægt að stilla á milli 130 og 220 volta straums. Gripirnir nr. Þjms. 2010-32 eru allir úr búi Jóhanns Hákonarsonar bifreiðastjóra (f. 1919, d. 1980) og Ragnhildar Sigurðardóttur húsmóður (f. 1921, d. 2008) sem bjuggu í Eskihlíð 13 í Reykjavík. Það var dóttir þeirra, Grímheiður Freyja Jóhannsdóttir, og bræður hennar sem afhentu gripina til safnsins, úr dánarbúi foreldra sinna. Freyja Hlíðkvist Ómarsdóttir og Lilja Árnadóttir, starfsmenn í munasafni Þjóðminjasafnsins, sóttu gripina á heimili þeirra Jóhanns og Ragnhildar í Eskihlíð 13. Einnig voru nokkrar ljósmyndir úr dánarbúi þeirra sem skráðar voru í Ljósmyndasafn Íslands.