Rakvélablaðabrýni

1940 - 1960

Varðveitt hjá

Rakblaðabrýni frá SIEMENS. Ytra byrði þess er úr svörtu plasti með merki framleiðanda. Rakvélar (svokallaðar sköfur) urðu algengar í kringum 1930. Þær voru með margnota rakvélablöðum. Ætla má að farið hafi verið að flytja slík brýni inn eitthvað eftir að rakvélarnar urðu algegnar, mögulega á 5. eða 6. áratug 20. aldar. Þetta brýni er framleitt í Danmörku. Það er í upprunalegum kassa sem merktur er SIEMENS á lokinu og Illum magasíninu á botninum. Í kassanum fylgja ennfremur notkunarleiðbeiningar á dönsku. Rakvélablaðið er brýnt þannig að því er komið fyrir í brýninu og því svo lokað. Það er snúra sem gengur gegnum brýnið og á öðrum enda hennar er lykkja sem brugðið er um einhvern krók, hurðarhún eða þvíumlíkt. Með annarri hendi er haldið í hinn enda snúrunnar svo hún sé strekkt. Með hinni hendinni er haldið um brýnið og því þrýst saman. Brýnið er svo dregið hratt upp og niður snúruna nokkrum sinnum. Við það hreyfist blaðið inni í brýninu, nuddast við slípisteina sem þar eru og eggjar blaðsins brýnast. Brýnið er heilt og í mjög góðu ástandi. Gripirnir nr. Þjms. 2010-32 eru allir úr búi Jóhanns Hákonarsonar bifreiðastjóra (f. 1919, d. 1980) og Ragnhildar Sigurðardóttur húsmóður (f. 1921, d. 2008) sem bjuggu í Eskihlíð 13 í Reykjavík. Það var dóttir þeirra, Grímheiður Freyja Jóhannsdóttir, og bræður hennar sem afhentu gripina til safnsins, úr dánarbúi foreldra sinna. Freyja Hlíðkvist Ómarsdóttir og Lilja Árnadóttir, starfsmenn í munasafni Þjóðminjasafnsins, sóttu gripina á heimili þeirra Jóhanns og Ragnhildar í Eskihlíð 13. Einnig voru nokkrar ljósmyndir úr dánarbúi þeirra sem skráðar voru í Ljósmyndasafn Íslands.