Reisla, + hlutv.

1880 - 1890

Varðveitt hjá

Reisla úr kopar, 34,7 cm löng, með steinlóði (reislusteini). Steinninn er 6,5 cm langur, 5,4 cm breiður og 3,8 cm þykkur. Reislan er haganlega smíðuð og er góður gripur. Hún er smíðuð af Einari Einarssyni frá Laxárdal, smið, organista og söngkennara í Hafnarfirði, um 1880-1890. Um hann segir m.a. í bókinni Nokkrar Árnesingaættir, ættaskrá og niðjatal (sjá ljósrit í fylgiskjölum aðfangabókar): Einar var fæddur í Laxárdal í Eystrihrepp. Árið 1880 tók hann við búi af móður sinni þar en árið 1883 hætti hann búskap og fluttist til Hafnarfjarðar með fjölskyldu sinni og bjó þar og starfaði til dauðadags. Einar var organisti í Garðakirkju og Bessastaðakirkju og kenndi söng við gamla gagnfræðaskólann í Flensborg í Hafnarfirði um skeið. Þetta voru þó hvort tveggja aukastörf. Aðallega lagði hann stund á allskonar smíði, var talinn þjóðhagasmiður og jafnvígur á tré, kopar og járn. Smíðaði m.a. saumavél að öllu leyti, prjónavél og 16 orgel, þar af 10 sem fóru í kirkjur landsins. Fyrsta orgelið smíðaði hann heima í Laxárdal, þá 19 ára gamall*. Hann var talinn mikill listamaður en mest yndi hafði hann af söng og tónlist. Eitthvað mun hann hafa fengist við tónsmíðar. Honum er lýst svo af samtímamanni sínum og sveitunga: „Einar organisti var bráðgjör, hár vexti, þrekinn um herðar og þykkur undir hönd og kraftalegur, ekki neitt fríður, ljóslitaður í andliti, með dökkt hár og manna karlmannlegastur, geðgóður og gamansamur. Snemma var hann duglegur til vinnu, svo að hann átti fáa jafningja. Göngumaður var hann með afbrigðum.“ Einar var móðurafi gefanda, Jóhanns Pálssonar, fyrrum garðyrkjustjóra. Fleiri gripir eftir Einar eru skráðir í Þjóðminjasafnið, þ. á. m. tvö orgel (harmonium), nr. Á-286 og 8426.