Prestakragi

1950 - 1980

Varðveitt hjá

Þór Jakobsson, veðurfræðingur, afhendir fyrir sína hönd og systkina sinna: Hefðbundinn prestakragi (pípukragi), úr hvítu lérefti. Kræktur saman með einni krækju. Kraginn er úr eigu föður gefenda, Jakobs Jónssonar, sóknarprests í Hallgrímskirkju í Reykjavík. Kom ásamt prestshempu nr. 2006-4-1 og prestakraga nr. 2006-4-2. Í bréfi sem fylgdi segir (sjá einnig í möppu: Fylgiskjöl Aðfangabókar): Málefni: afhending til eignar hempa dr.theol. Jakobs Jónssonar Það er mér og systkinum mínum, Guðrúnu Sigríði og Jón Einari, ánægjuefni að Þjóðminjasafn Íslands vilji þiggja hempu föður okkar, dr. Jakobs Jónssonar, sóknarprests í Hallgrímskirkju í Reykjavík árin 1940 til 1974. Faðir okkar lést 17. júní 1989. Það var ósk móður okkar, Þóru Einarsdóttur, sem lést 1994, og Svövu systur okkar sem lést fyrir rúmum tveimur árum, en hempan var geymd á heimili hennar. Afhendist hempan hér með til eignar og varðveislu ásamt tveimur krögum, misstórum. Hér fylgja nokkrara upplýsingar um hempuna. Eru þær frá Guðrúnu Sigríði og manni hennar Hans W. Rothenborg lækni sem búa í Kaupmannahöfn. Áttu þau einnig heima þar þegar hempan var saumuð hjá virtum klæðskera í Kaupmannahöfn um það bil árið 1960. Þau voru foreldrum mínum innan handar þegar þeir voru þar á ferð eitt sinn sem oftar og gengu frá kaupum á hempunni. Nafn klæðskerans er Holger Voigt Petersen (f. 20.8.1915) og var verslunin til húsa í Bredgade. Voigt Petersen naut virðingar og var formaður sambands klæðskerafélaga í Danmörku um árabil, frá árinu 1962 og líklega fram á níunda áratuginn ("oldermand for skrædderlauget i Danmark"). Þetta er elsta iðnfélag Danmerkur og munu rætur þess liggja 600 - 700 ár aftur í tímann. Voigt Petersen byrjaði klæðskerastarfið hjá Carl & Martin Larsen sem hann síðan tók við af. Árið 1973 varð það hans eigið fyrirtæki og sameinaðist það Brödrene Andersen. Nánari upplýsingar um Holger Voigt Petersen má finna í svonefndri Kraks Blaa Bog. Því miður hef ég ekki nánari upplýsingar um uppruna kraganna tveggja sem faðir minn hefur "haft til skiptanna". Mér verður að lokum hugsað til óteljandi athafna sem faðir minn hefur skrýðst hempunni, um 15 ára skeið sóknarprestur í fjölmennri sókn í höfuðstaðnum, við messur, skírnir, fermingar, brúðkaup og jarðarfarir, og önnur 15 ár oft og tíðum við ýmsar athafnir sem hann tók þátt í eftir að hann lét af embætti, síðast við samkirkjulega guðsþjónustu á Þingvöllum þ. 3. júní 1989 í tilefni af heimsókn páfans Jóhannesar Páls II. Virðingarfyllst, f.h. systkina minna Þór Jakobsson Espigerði 2(2E) 108 Reykjavík.

Aðrar upplýsingar

Jakob Jónsson, Notandi
Gefandi: Þór Edward Jakobsson

Ártal

1950 - 1980

Safnnúmer

Safnnúmer B: 2006-4-3

Stærð

27 x 2.4 x 6.5 cm Lengd: 27 Breidd: 2.4 Hæð: 6.5 cm

Aðfangategund

Munir

Undirskrár

Undirskrá: Munasafn

Efnisorð / Heiti

Efnisorð: Prestakragi