Mótmælaskilti
2009
Varðveitt hjá
Þjóðminjasafn Íslands
Mótmælaspjald sem notað var í mótmælunum
í miðborg Reykjavíkur í kjölfar efnahagshrunsins haustið 2008, hinni svokölluðu
Búsáhaldabyltingu. Það var Illugi Jökulsson, fjölmiðlamaður og útgefandi,
sem bar spjaldið og afhenti safninu. Spjaldið sjálft er krossviðarplata
(h. 42,9; br. 60,7 cm) sem negld er á viðarskaft. Á framhlið spjaldsins
er málað í svörtum lit: GEIR ER GAGNSLAUS, og á bakhlið þess málað í sama
lit: STOPPUM SKRÍPALEIKINN. Þann 29. janúar 2010 birtist eftirfarandi frétt
á fréttamiðlinum www.dv.is:
„Föstudagur 29. janúar 2010 kl
13:12
Höfundur: Ritstjórn DV (ritstjorn@dv.is)
„Ég ætla að fara með skiltið á
Þjóðminjasafnið í dag,“ segir Illugi Jökulsson, rithöfundur og fjölmiðlamaður.
Þjóðminjasafnið auglýsti nú nýverið eftir minjum úr hinni svokölluðu búsáhaldabyltingu
sem fram fór á haustmánuðum 2008 og í upphafi ársins 2009. „Geir er gagnslaus“
er slagorðið sem Illugi setti á skilti sitt í búsáhaldabyltingunni. Hann
segir að slagorðið hafi orðið til þegar hann ákvað að taka með sér skilti
á mótmælafund sem tónlistamaðurinn Hörður Torfason hélt á Austurvelli.
Það hafi síðan fylgt honum á öllum þeim mótmælafundum sem haldnir voru
á laugardögum þar til ríkisstjórn Sjálfstæðisflokks og Samfylkingar fór
frá í upphafi árs 2009. „Ég tók skiltið hins vegar snögglega úr notkun
þegar Geir tilkynnti um sín veikindi. Það hefur síðan safnað ryki heima
hjá mér. Ég tími ekki að henda því og þess vegna ætla ég að skella því
á Þjóðminjasafnið,“ segir Illugi. Aðspurður hvort hann ætli að mótmæla
eitthvað á næstunni segist Illugi alls ekki vera sáttur við núverandi ástand
í þjóðfélaginu. Það hafi ekki þróast í rétta átt. „Ég er ekki frekar en
aðrir sáttur við núverandi ástand. Ætli maður bíði ekki og sjái hvað gerist
á næstu vikum. Það er aldrei að vita hvenær ég fer aftur að mála skilti,“
segir hann.
as@dv.is“
Síðar um daginn kom Illugi með spjaldið
í safnið.
Aðrar upplýsingar
Ártal
2009
Efni
Safnnúmer
Safnnúmer B: 2010-4
Stærð
196.7 x 60.7 x 0 cm
Lengd: 196.7 Breidd: 60.7 Hæð: 0 cm
Aðfangategund
Undirskrár
Undirskrá: Munasafn
Efnisorð / Heiti
Efnisorð: Mótmælaskilti