Ljóð

1910

Varðveitt hjá

Handskrifað frumrit Þorsteins Erlingssonar að ljóði til Kristínar Þorkelsdóttur, dagsett 20.6.1910. Ljóðið er skrifað á tvær samanbrotnar arkir. Arkirnar eru jafn stórar, 11,3 cm á breidd og 8,7 cm á hæð, samanbrotnar. Bréf frá gefanda sem kom til safnsins með ljóðinu var sett í skjalasafn en ljósrit af því er í möppu: Fylgiskjöl Aðfangabókar. Í þessu bréfi kemur fram að Kristín Þorkelsdóttir var fædd á Nýlendugötu 22 í Reykjavík. Hún var í vist hjá Guðrúnu og Þorsteini frá 16 ára aldri en um tvítugt fór hún norður á Langanes og giftist þar manni sem hét Bergur Sæmundsson. Þau áttu eina dóttur en Bergur lést eftir skamma sambúð. Árið 1917 fór hún sem kaupakona með dóttur sína að Kolsstöðum í Hvítársíðu og giftist þar glæsilegum bóndasyni, Sigurði Guðmundssyni (sjá Borgfirskar æviskrár X, bls. 104-105). Þau hjónin bjuggu þar meðan heilsa leifði og áttu fimm stráka og eina stelpu. Þau dóu bæði í hárri elli. Ljóðið er eftirfarandi: Til Kristínar Þorkelsdóttur. Jeg ósk' að þú, Stína mín, leikir þjer lengi, og lífið og hamingjan verði þjer blíð, og hafir í flokk um þig hýreyga drengi sem hver önnur stúlka, sem kát er og fríð. En varaðu' á spjátrungum hönd þína' og háls og hoppaðu' að tvítugu dansandi frjáls. En ef þú svo kinninni' að einhverjum hallar, þá óska jeg það verði fríðasti sveinn, svo meyjarnar hjerna þig öfundi allar, og indælla' og sætara kyssi' ekki neinn. En verði' hann þjer vondur, þá skjóttu honum skjá, og skopraðu dansandi frá honum þá. 20. júni 1910. Þorsteinn Erlingsson.

Aðrar upplýsingar

Þorsteinn Erlingsson, Hlutinn gerði
Gefandi: Ragnheiður Sigurðardóttir

Ártal

1910

Efni

Lífræn efni, Pappír

Safnnúmer

Safnnúmer B: 2006-15

Stærð

11.3 x 8.7 cm Lengd: 11.3 Breidd: 8.7 cm

Aðfangategund

Munir

Undirskrár

Undirskrá: Munasafn

Efnisorð / Heiti

Efnisorð: Ljóð