Dragkista

1800 - 1820

Varðveitt hjá

Dragkista (kommóða) úr eik, útlend og líklega frá byrjun 19. aldar, en hefur verið smíðuð upp og bæsuð hér á safninu nýlega. Hún er 1,035 m á hæð og eru þá meðtaldir 8 cm langir/háir fætur, kantaðir: breiddin er 1,24 m (plata og botn lítið eitt breiðari) og þykktin (eða dýptin) 50 cm, platan þó eilítið meira, vegna þess að brún hennar stendur fram af og sama er að segja um botninn. Brúnir þessar eru strikheflaðar og sömuleiðis bæði framhorn kommóðunnar. Undir plötubrúnunum eru tenntir listar. Skúffurnar eru 4, allar jafnbreiðar, og eru framhliðar þeirra með ávalt hefluðum brúnum og nokkru hærri, sléttri miðju. Framan á hverri skúffu eru 3 látúnsskildir kringlóttir, 5 cm í þvm, og er skráargat á þeim í miðjunni, en hringar á hinum tveimur. Eru þeir festir efst á skildina og falla að þeim, þegar ekki er verið að draga skúffurnar út. Hliðum dragkistunnar er skipt í tvennt þvert yfir, enda hefur hún upphaflega verið í tvennu lagi. - Var áður í eigu Filippusar Jónssonar í Hellutúni, afabróður seljanda, Stefáns Jónssonar í Ási í Holtum.