Samfella
1760 - 1816
Varðveitt hjá
Þjóðminjasafn Íslands
Samfella úr dökkbláum dúk, l. 105 cm. vídd neðst 265+74 cm. (svuntan). Neðzt er marglitur blómstursaumur með ýmsum litum breiðastur og að öðru leyti frábrugðinn að framan, á svuntunni. Rauð bridding á jaðrinum að neðan: klæðisbrydding rauð á svuntujöðrunum öllum þremur. Undir svuntunni neðst er rósþrykt fóður: annars bláröndótt hörljereptsfóður neðst og sömuleiðis undir strenginum. - Safnið á 3 samfellur með blómstursaum: nr. 441, þessa og nr. 2868. Sigurður Vigfússon, forstöðumaður safnsins, telur hina síðustu vera eptir Guðrúnu dóttur Skúla landfógeta Magnússon og bætir því við, að safnið eigi tvær samfellur áður aðra eptir Guðrúnu, en hina eptir Halldóru, dætur Skúla. Nú telur Sigurður málari Guðmundsson nr. 441 vera eptir Halldóru 1) og hlýtur Sigurður Vigfússon því að hafa litið svo á, að nr. 1770, þessi er nú er lýst hjer, væri eptir Guðrúnu. Mun hann vafalaust hafa átt við Guðrúnu eldri, sem giptist Jóni Sýslumanni Snorrasyni, en misti hann eptir 11 ára sambúð (1771) og lifði síðan ekkja til æviloka (1816), fyrst áfram norður í Skagafirði, en síðan fór hún suður til föður síns og dvaldi hjá honum og síðan Ólafi stiptamtmanni Stefánssyni og Magnúsi konferensráði. Hún var handvirðakona mikil, segir Jón sýslum. Espólín ( Árb. X.101). - Samfella þessi er að öllu leyti vel gjörð, en vönduðust af þeim öllum er þó nr. 2868.
Samfellu þessa seldi Hólmfríður Björnsdóttir (Rósinkrans) safninu. Líkl. samfella sú, sem Hólmfríður Þorvaldsdóttir átti og Guðrún Borgfjörð getur um í Minningum bls. 131 sem hafandi verið samfella Guðrúnar sjálfrar. (1968, EEG.)
Guðrún Borgfjörð segir svo frá:
„Böll voru líka haldin þar [þ.e. í húsinu Glasgow á Vesturgötu í Reykjavík], og þar var haldið fyrsta grímuballið, sem ég man eftir. Þá var ég um tvítugt,* en ekki held ég, að það hefðu þótt fínir búningar nú á tímum, sem þar komu fram. Þeir voru heldur lítilfjörlegir. Ég var þar, eins og alls staðar, sem eitthvað var um að vera, og klædd í gamla faldbúninginn með krókfaldinn. Frú Hólmfríður Þorvaldsdóttir bjó mig út. Hún átti þá samfellu, sem nú er á forngripasafninu, en saumað og átt hafði Guðrún, dóttir Skúla fógeta. Það var nú ekki beinlínis flík til að dansa í. Það er líklega í eina skiptið, sem hún var höfð til þess. Ég var vel ánægð með sjálfa mig, og enginn þekkti mig.“ (FHÓS, sept. 2025).
*Guðrún Borgfjörð var fædd árið 1856 svo grímuballið hefur verið haldið í kringum 1875.
1) Skýrsla um Forngrs. Íslands, II, bls. 48.
Aðrar upplýsingar
Ártal
1760 - 1816
Safnnúmer
Safnnúmer A: 1770
Safnnúmer B: 1880-2
Stærð
105 x 339 cm
Lengd: 105 Breidd: 339 cm
Aðfangategund
Undirskrár
Undirskrá: Munasafn
Efnisorð / Heiti
Efnisorð: Samfella