Til baka í leit
Veistu meira?

Skatthol

Varðveitt hjá
Þjóðminjasafn Íslands
Skatthol, gamalt, úr eik, með venjulegu lagi, sem átt hefur Finnur Jónsson Skálholtsbiskup. Þykkt fjala mest 6,2 cm. Með skáloki við framhlið, sem snýst um hjarir að neðanverðu, aftan þess níu skúffur og eitt geymsluhólf, en undir plötu höfð ein grunn skúffa, sem nær næstum gafla á milli. Í skattholinu að neðan eru svo þrjár stórar skúffur í röð niður úr. Fjórir fætur, lágir, eru undir við horn. Fjalir eru felldar saman um nót, tappaðar saman eða geirnegldar. Neðan plötu skiptist skattholið í tvennt, lárétt, og er hafður til aðhalds tappi við miðja gaflbrún sitt hvoru megin. Hornstuðlar eru að framan í neðri hluta, undir skúffum að framan og til hliða liggja þverslár, í holtré eru tvær fjalir, en ein í endum í efri hluta, og í bakhlið þar og botni. Aftan loksins, sem í er ein fjöl, skiptist allt bilið milli holtrés og skrifplötu í þrennt með lóðréttum skilrúmum, og eru þrjár skúffur hver upp af annari úti við endana, en á milli ein skúffa niðri við plötu, hólf með læstri hurð er ofan hennar, og sitt hvoru megin háar og mjóar skúffur. Sporlaga tréplötur, dökkar, á skúffunum tveimur og á hurð, til skrauts. Í neðri hluta er höfð ein fjöl í göflum báðum, bakhlið og botni. Settur er hanki úr látúni á skúffurnar, sem eru ofan plötu, mitt á framhlið, og hjá skráargatinu á hurð er látúnsfluga. við lokið eru tvennar látúnshjarir, skrúfaðar á, hjá skráargatinu tígullaga harðviðarplata, svört, felld í, og úti við enda ganga undir lokið tvær rennifjalir, 7,7 cm á breidd mest, stálteinn liggur milli endanna á spýtum þessum að aftan og miðra enda á loki skattholsins, svo að þær færast undir það eða undan því, þegar það er hreyft til. Á stóru skúffunum þremur eru tvær höldur úr látúni, og sett er þar látúnsplata við skráargöt. Listar með skásniði, strikheflaðir, liggja efst á göflum, ofan samskeytanna milli efri hluta og neðri, bæði að framanverðu og við gaflana, og umgerð lista er hjá brúnum að neðan. Hornstólparnir eru ávalir og prýddir hefluðum rákum. Allt er skatthol þetta brúnlakkað utan, nema bakið. Nokkuð laslegt orðið, talsvert sprungið, og víða minni háttar meiðsl, lok rifið að endilöngu, höldurnar hafa losnað og sumar tínst, víða sjást blettir og lakkhúðin er orðin slitleg. Eftir Finn biskup Jónsson átti skatthol þetta Hannes Finnsson biskup, sonur hans (að öllum líkindum), síðan Ólafur Hannes Finsen sonur Hannesar, því næst sonur Ólafs, Óli P. Finsen, póstmeistari, og eftir hann sonur hans, Karl Finsen, faðir Maríu sem gefur það nú. Skráð stærð í Sarpi 2: "L. 19,6; Br. 54; H. 108; Þ. 6,2 cm"

Aðrar upplýsingar

Efni
Safnnúmer
Safnnúmer B: 1965-355
Stærð
19.6 x 54 x 108 cm Lengd: 19.6 Breidd: 54 Hæð: 108 cm
Aðfangategund
Undirskrár
Undirskrá: Munasafn
Efnisorð / Heiti
Efnisorð: Skatthol