Askur
1836
Varðveitt hjá
Þjóðminjasafn Íslands
Úr aðfangabók:
Mataraskur úr furu, með venjulegu lagi, 14 cm á hæð og 15,9 cm að þvermáli um miðja bumbuna. Útskurðurinn á lokinu er mjög líkur og á nr. 6256 o. fl., en ekki alveg eins. Á tungunni er ártalið 1836. - Norðan úr Vatnsdal.
Askurinn er smíðaður af Stefáni Jónssyni askasmið á Mallandi á Skaga(strönd).
Á minjaslóð:
Þarna er talað um að askar skornir af Stefáni Jónssyni séu svo áþekkir að hægt sé að nota svipaða lýsingu fyrir þá. Sú lýsing fylgir hér á eftir:
Askarnir eru af venjulegri stærð og með venjulegu lagi, en útskurðurinn á lokinu er mjög sérstæður. Á miðju loki er sléttur flötur, sem á er skorin sexblaðarós, og innan í henni er eins konar stjarna. Umhverfis eru hringar með fleygskurði, ýmis örfínir hringar, sem minna á krákustíg, eða allgrófir hringar, líkastir tannhjóli, og er þess konar hringur úti við lokbrún. Upp af totu og hlýrum ganga ferhyrndir, upphækkaðir fletir með fleygskurði og lítils háttar skipaskurði, og er eins og skurðurinn á lokinu sjálfu hverfi undir þá. Frammi við totuna er ártal, en á hlýrum skakkskornir ferhyrningar, samsíðungar, en stundum þó aðeins fleygskurðarbekkir. Til hliðar á lokinu eru blóm, líkust klofnum túlípanablómum („klukkublóm“), og er þetta sameiginlegt einkenni á öskum þeim, sem telja má eftir Stefán. Þau slíta í sundur bekkina eða kransana á lokinu. Ofan á uppistöðunni eru yfirleitt þrír skákrossar, en annars er enginn útskurður á askinum sjálfum.
(Sett inn af Sigrúnu Blöndal, 5.1.2011)
Aðrar upplýsingar
Stefán Jónsson, Hlutinn gerði
Ártal
1836
Efni
Safnnúmer
Safnnúmer A: 12147
Safnnúmer B: 1937-103
Stærð
14 x 15.9 cm
Lengd: 14 Breidd: 15.9 cm
Aðfangategund
Undirskrár
Undirskrá: Munasafn
Efnisorð / Heiti
Efnisorð: Askur
Heimildir
Þór Magnússon. Á minjaslóð. Reykjavík, 2007: bls. 105-109.