Kanna, sem borðbúnaður og drykkjarílát

1850 - 1890

Varðveitt hjá

Kanna, eða stór „fantur“ með haldi. Hún er úr hvítum leir, með hvítum glerungi að innan og á haldi, en með brúnum, svörtum og bláum röndum að utanverðu. Kvarnast hefur úr könnubarminum á einum stað og sprunga er meðfram botni, annars er kannan í góðu ástandi. Ætla má að hún sé frá 1850-1890. Kannan kom til safnsins frá Petrínu Kristínu Jónsdóttur, og er úr búi móðurforeldra hennar að Malarrifi á Snæfellsnesi. Hún var notuð til að gefa ferðafólki hressingu, sbr. meðfylgjandi upplýsingar á blaði frá gefanda: „Þessi kanna var til á Malarrifi þegar mamma var barn að aldri, og var höfð til að gefa ferðafólki að drekka, þá helst mjólk. Mamma mín var Sveinbjörg Pétursdóttir frá Malarrifi, hún var fædd 19.1.1886. Ingibjörg móðir hennar gaf henni könnuna þegar amma hætti að búa 1912. Þannig er hún komin í mínar hendur, því ég var einkabarn foreldra minna. Kannan á að fara til Þjóðminjasafnsins til eignar. Reykjavíkurvegi 31 R. 12/3 1980 Kristín Jónsdóttir“ Gripirnir nr. 2010-29-5 til 10 komu til safnsins 29.6.1998 en áttu ekki að skrást inn í safnið fyrr en fleiri gripir kæmu úr búi Petrínu Kristínar Jónsdóttur eftir hennar dag. Dóttir hennar, Kristín Helgadóttir, kom svo með fleiri gripi úr hennar búi (Þjms. 2010-29-1 til 4) þann 31.5.2010 og þá var ákveðið að skrá alla gripina saman á eitt númer, þ.e. 2010-29. Gripunum fylgdi fjöldi upplýsinga, prentaðra og skrifaðra, sem varðveittar eru í möppu: Fylgiskjöl aðfangabókar. Þetta eru eftirfarandi gögn: Æviágrip Guðbjargar Helgadóttur frá Gíslabæ á Hellnum (f. 21.11.1885). Ljósrit af minningargreinum um Kristínu Jónsdóttur (Petrínu Kristínu Jónsdóttur). Ritgerð um Jóhannes Helgason frá Hellnum, eftir Hildi Margrétardóttur. Ljósrit af grein úr Lesbók Morgunblaðsins, 2. september 2000, um Jóhannes Helgason frá Gíslabæ á Hellnum. Ljósmyndir af gripum eftir Jóhannes Helgason frá Gíslabæ á Hellnum. Gjafabréf til Hellnakirkju varðandi útskorinn ramma eftir Jóhannes Helgason um altaristöflu í kirkjunni. Úrklippur úr dagblöðum um útskorna rammann um altaristöfluna í Hellnakirkju. Ljósrit af uppskrift af ljóði (grafskrift) um Jóhannes Helgason skurðlistamann frá Gíslabæ á Hellnum. Ljóðið Förukarlinn eftir Davíð Stefánsson, handskrifað á tvö blöð. Ljósmynd af Baðstofugafli síðasta Malarrifsbæjarins. Ljósrit af skjalaskrám Borgarskjalasafns Reykjavíkur, úr skjalasafni Kristínar Helgadóttur þar, um hana sjálfa, um móður hennar, og um Guðmund Kristjánsson. Gjafabréf til Þjóðminjasafnsins sem fylgdi gripunum sem bárust 1998 (Þjms. 2010-29-5 til 10). Fleiri gögn.