Ávísanahefti
1928
Varðveitt hjá
Þjóðminjasafn Íslands
Ávísanahefti frá Landsbanka Íslands. Heftið er upplitað á forsíðu og baksíðu en hefur upphaflega verið blágrænt að lit og sést sá litur á innanverðri forsíðu og baksíðu. Allar ávísanirnar eru enn í heftinu. Þær eru prentaðar með grænu bleki. Á hverri síðu er vinstra megin lítill flipi þar sem númer ávísunarinnar kemur fram og hægt er að fylla út helstu upplýsingar. Hægra megin við flipann eru rifgöt þar sem ávísunin er rifin úr og verður flipinn þá eftir í heftinu. Á ávísuninni sjálfri er númer hennar og reitir til að fylla út helstu upplýsingar. Á hverri ávísun er merki Landsbankans, þrír hringir með flúri í kring sem raðast lóðrétt. Miðjuhringurinn er stærstur og inni í honum er fálki. Meðfram brúnum hringsins stendur Landsbanki (að ofan) og Íslands (að neðan). Hinir hringirnir eru jafnstórir. Í efri hringnum er fjallkonan og í þeim neðri er það sem virðist vera gríski guðinn Hermes. Heftið er aðeins slitið í neðra vinstra horni. Framan á heftinu er minnst á pöntunarseðil sem á að vera aftast í heftinu en hann er ekki til staðar. Efst á forðsíðuna er handskrifað „Áv 2136 - ". Á forsíðu heftisins er prentaður textinn: „Landsbanki Íslands í Reykjavík".
Þar fyrir neðan eru listaðar upp sex notkunarreglur:
1. Gætið þess, að í ávísanahepti þessu sjeu öll eyðublöðin nr. 65101 til 65150 (tölustafir eru handskrifaðir á punktalínur)
2. Geymið hepti þetta vandlega. Ávísanir á þessum eyðublöðum einungis gildar.
3. Ávísa má á inneign í einu án uppsagnarfrests alt að 1000 krónum og eigi meira en 5000 kr. á mánuði, en eptir uppsögn samkv. reglugerð bankans 53. gr., ef um stærri upphæðir er að ræða.
4. Minnið þann á, er þjer gefið ávísun, að skrifa nafn sitt aptan á hana, áður en hún er send bankanum.
5. Ávísun verður ekki tekin gild nema númerið á bókinni sje skrifað á hana.
6. Biðjið um nýtt hepti í tíma. Notið til þess pöntunarseðilinn aftast í heptinu og undirskrifið hann sjálfur, eins og allar ávísanir.
Upplýsingar frá gefanda:
Tékkahefti úr dánarbúi Ólafs Þórs Thorlacius (f. 1936, d. 2024). Foreldrar hans voru Guðni Thorlacius (f. 1908, d. 1975) og Margrét Ó. Thorlacius (f. 1909, d. 2005). Gefandi telur að tékkabókin hafi verið í eigu Guðna. Tékkaheftið var tekið í safneign Þjóðminjasafns Íslands árið 2025, einnig var tekið við vasahníf (Þjms. 2024-79-1) úr sama dánarbúi.
Aðrar upplýsingar
Ártal
1928
Efni
Safnnúmer
Safnnúmer B: 2024-79-2
Stærð
20.3 x 0.4 x 8.1 cm
Lengd: 20.3 Breidd: 0.4 Hæð: 8.1 cm
Aðfangategund
Undirskrár
Undirskrá: Munasafn
Efnisorð / Heiti