Svipa
1870 - 1930
Varðveitt hjá
Þjóðminjasafn Íslands
Svipa með leðuról. Ólin er 77 cm að lengd. Skaftið er úr ljósum viði, 29 cm að lengd, sem aðeins hefur flísast upp úr. Samfelld lengd svipunnar er 106 cm. Silfurlitaðir málmhólkar með greyptu mynstri eru á hvorum enda skaftsins. Spanskgræna er á hólkunum, þeir eru líklega úr nýsilfri. Á enda skaftsins er húnn og í hann er fangamarkið ÁB grafið. Húnninn er 3 cm að þvermáli.
Svipan var í eigu Árna Björnssonar (f. 1863, d. 1932), prófasts á Görðum á Álftanesi. Árni var fæddur í Höfnum á Skagaströnd. Foreldrar hans voru Björn Sigurðsson (f. 1840, d. 1868) bóndi í Höfnum og síðar á Tjörn í Skagaströnd, og Elín Jónsdóttir (f. 1833, d. 1902) húsfreyja. Árni varð stúdent í Reykjavík 1885 og cand. theol. úr Prestaskólanum 1887. Árna var veitt Reynistaðaprestakall það sama ár og Garðaprestakall á Álftanesi 1913. Hann var skipaður prófastur í Skagafjarðarprófastsdæmi 1909 og í Kjalarnesprófastsdæmi 1916. Hann sat í Hafnarfirði frá 1928. Árið 1894 giftist hann Líneyju Sigurjónsdóttur (f. 1873, d. 1953) frá Laxamýri í Aðaldal. Þau eignuðust ellefu börn.
Gefendur eru systurnar Margrét Birna (f. 1955) og Erla Björg (f. 1957) Skúladætur. Svipan var í íbúð foreldra gefenda, verkfræðingsins Skúla Guðmundssonar (f. 1924, d. 2002) og Aðalbjargar Björnsdóttur (f. 1926, d. 2021) framhaldsskólakennara. Árni Björnsson var föðurafi Aðalbjargar. Svipan er sennilega frá síðari hluta 19. aldar eða fyrri hluta þeirrar 20.
Gefendur afhentu fleiri muni úr fórum foreldra sinna, eru þeir allir skráðir undir Þjms. 2021-24. Þar á meðal var kvensvipa (Þjms. 2021-24-10).
Aðrar upplýsingar
Ártal
1870 - 1930
Efni
Safnnúmer
Safnnúmer B: 2021-24-9
Stærð
106 x 3 cm
Lengd: 106 Breidd: 3 cm
Aðfangategund
Undirskrár
Undirskrá: Munasafn
Efnisorð / Heiti
Efnisorð: Svipa
Heimildir
Benjamín Kristjánsson og Björn Magnússon. (1947). Íslenzkir guðfræðingar 1847-1947 (II. bindi). Leiftur.