Til baka í leit
Veistu meira?

Sjúkrahjálmur

1939
Varðveitt hjá
Þjóðminjasafn Íslands
Sjúkrahjálmur, hjálmur hjúkrunarkonu úr síðari heimsstyrjöldinni. Hjálmurinn er 30,5 x 28,5 cm að stærð og um 13 cm á hæð. Hjálmurinn hefur verið málaður hvítur að utanverðu og á innanverðu barðinu. Fyrir miðju á hjálminum framanverðum er rauður kross málaður, um 4,5 x 4,5 cm að stærð. Hlíf er í hjálminum innanverðum og ól sem strengd er undir höku. Hægt er að strekkja á bæði hlíf og ól. Hlífin er merkt stærðinni 6 og 3/4. Framleiðslustimpillinn TTC I og framleiðsluárið 1939 er á henni, hún hefur því verið framleidd af Teddy Toy Company Ltd. í Dagenham. Á barðinu á hjálminum innanverðum má greina framleiðslustimpilinn RO & CO, við hliðina á er stimplað KY og framleiðsluárið 1939. Hjálmurinn er því bresk smíði, framleiddur af Rubery Owen & Co. Ltd. í Leeds. Hér er líklega um MkII (Mark II) hjálm að ræða. Á barðinu innanverðu hefur verið skrifað með blýanti Geirþr. Hjálminum fylgir fölbleikur taupoki, opinn í annan endann. Pokinn er 43 x 32 cm að stærð. Hjálmurinn hefur að öllum líkindum verið geymdur í pokanum síðari ár. Gefendur eru systurnar Margrét Birna (f. 1955) og Erla Björg (f. 1957) Skúladætur. Um er að ræða hjálm húkrunarkonunnar Geirþrúðar Ásgeirsdóttur (f. 1904, d. 1991) frá seinni heimsstyrjöldinni. Geirþrúður var ömmusystir gefenda. Geirþrúður fæddist að Arngerðareyri í Norður-Ísafjarðarsýslu og var dóttir Ásgeirs Guðmundssonar (f. 1849, d. 1914) bónda og hreppstjóra og Aðalbjargar Jónsdóttur (f. 1860, d. 1922) húsfreyju. Hún flutti til Reykjavíkur og stundaði fyrst nám við Kvennaskólann og nam síðan hjúkrun við Hjúkrunarskóla Íslands. Þaðan lauk hún prófi 1935. Eftir námið starfaði hún við The General Hospital í Birmingham þar til hún hélt til Danmerkur í framhaldsnám í geðhjúkrun og fæðingarhjálp. Þaðan útskrifaðist hún 1936. Eftir að Geirþrúður sneri heim úr námi starfaði hún á Vífilsstaðaspítala, þá hjá Hjúkrunarfélaginu Líkn í Reykjavík og síðar á Heilsuverndarstöð Reykjavíkur. Geirþrúði var veittur riddarakross hinnar íslensku fálkaorðu árið 1981 fyrir störf sín í þágu hjúkrunar- og líknarmála. Árið 1941 gekk hún að eiga rithöfundinn Jóhann J. E. Kúld (f. 1902, d. 1986). Þau eignuðust eina dóttur, Halldóru, en hún lést einungis 12 daga gömul. Hjálmurinn var í íbúð foreldra gefenda, verkfræðingsins Skúla Guðmundssonar (f. 1924, d. 2002) og Aðalbjargar Björnsdóttur (f. 1926, d. 2021) framhaldsskólakennara. Gefendur afhentu fleiri muni úr fórum foreldra sinna, eru þeir allir skráðir undir Þjms. 2021-24. Samskonar sjúkrahjálmar eru varðveittir í Þjóðminjasafni Íslands, sjá NS-6144 og HM 2011-20.

Aðrar upplýsingar

Ártal
1939
Efni
Safnnúmer
Safnnúmer B: 2021-24-4
Stærð
30.5 x 28.5 x 13 cm Lengd: 30.5 Breidd: 28.5 Hæð: 13 cm
Aðfangategund
Undirskrár
Undirskrá: Munasafn
Efnisorð / Heiti
Efnisorð: Sjúkrahjálmur
Heimildir
Geirþrúður Ásgeirsdóttir Kúld - Minning. (1991, 30. maí). Morgunblaðið, bls. 42-43. Sótt af: https://timarit.is/page/1744496 United Kingdom MkII. Brendon's Helmets. Sótt af: http://brendonshelmets.weebly.com/united-kingdom-mkii.html