Til baka í leit
Veistu meira?

Motta

1925 - 1945
Varðveitt hjá
Þjóðminjasafn Íslands
Motta úr hrosshári. Mottan er ferhyrnd, hún er um 90 cm að lengd og 61 cm að breidd. Mottan er ofin úr fjórum mismunandi litum sem liggja hlið við hlið og mynda oddhvasst mynstur, svo að ljósari litirnir eru innst á hverjum oddi en þeir dekkri yst. Svartlitað efni er bryddað á hvora skammhlið mottunnar og festir hrosshárin niður, en þau eru tekin að losna upp á sumum stöðum. Gefendur eru Berglind Nanna Ólínudóttir (f. 1969), Dómald Leó Burknason (f. 1971), Sævar Valur Sveinsson (f. 1981) og Hafþór Helgi Sveinsson (f. 1983). Valdís Sveinsdóttir (f. 1967) afhenti fyrir hönd gefenda. Gefendur telja Ingibjörgu Guðrúnu Kristjánsdóttur (f. 1914, d. 1980), formóður sína, hafa ofið mottuna. Hefur Ingibjörg líklega ofið mottuna á fyrri hluta 20. aldar. Ingibjörg var fædd að Kirkjubóli í Korpudal í Önundarfirði. Foreldrar hennar voru Kristján Björn Guðleifsson (f. 1886, d. 1932) bóndi og Ólína Guðrún Ólafsdóttir (f. 1885, d. 1971), en bæði voru þau ættuð úr Dýrafirði. Fjölskyldan flutti að Brekku á Álftanesi árið 1926 en að Efraseli í Hrunamannahreppi í Árnessýslu árið 1928. Eftir andlát Kristjáns flutti Ólína með börnin til Reykjavíkur. Þar lærði Ingibjörg kápu- og kjólasaum og hlaut meistararéttindi í báðum greinum. Varð hún þar með meðal fyrstu kvenklæðskerameisturum landsins. Ingibjörg rak saumastofu með systur sinni um árabil og starfaði í Kjólarameistarafélagi Íslands síðari ár. Árið 1944 giftist hún Sveini A. Sæmundssyni (f. 1916, d. 1997) blikksmíðameistara. Sveinn var frá Eiríksbakka í Biskupstungum, sonur hjónanna Arnleifar Lýðsdóttur (f. 1877, d. 1960) og Sæmundar Jónssonar (f. 1876, d. 1926). Sveinn stundaði búfræðinám á Hvanneyri og flutti til Reykjavíkur 1942 þar sem hann hóf nám í blikksmíði ári síðar. Ingibjörg og Sveinn fluttu í Kópavog 1948 og reistu þar húsið Vallargerði 2. Þar bjuggu þau ásamt dætrum sínum tveimur, Öldu (f. 1945) og Ólínu (f. 1948, d. 2023), auk þess sem blikksmiðjan Vogur, atvinnurekstur Sveins, var þar til húsa fyrstu árin. Ingibjörg var liðtæk í félagsstörfum, hún starfaði t.a.m. í Kvenfélagi Kópavogs og var formaður félagsins 1971-73. Mottan kom úr dánarbúi Ólínu Sveinsdóttur (f. 1948, d. 2023), móður Berglindar Nönnu og Dómalds Leós og ömmu Sævars Vals og Hafþórs Helga. Mottunni fylgdi einnig söðuláklæði (Þjms. 2023-46-2) og styttuband sem afhent var safnfræðslu Þjóðminjasafns Íslands og skráð var í snertisafn þess (Sns-22). Áþekk gólfmotta er varðveitt í Heimilisiðnaðarsafninu (HB-184).

Aðrar upplýsingar

Ártal
1925 - 1945
Efni
Safnnúmer
Safnnúmer B: 2023-46-1
Stærð
90 x 61 cm Lengd: 90 Breidd: 61 cm
Aðfangategund
Undirskrár
Undirskrá: Munasafn
Efnisorð / Heiti
Efnisorð: Motta
Heimildir
Minning: Ingibjörg Guðrún Kristjánsdóttir. (1980, 16. apríl). Morgunblaðið, bls. 22-23. Sótt af: https://timarit.is/page/1525672