Til baka í leit
Veistu meira?

Innsigli

1880 - 1920
Varðveitt hjá
Þjóðminjasafn Íslands
Innsigli úr kopar. Flöturinn er sporöskjulaga og í hann er grafið "J Andrésson". Flöturinn er 2,3 x 1,8 cm að stærð. Fóturinn er heilsteyptur og sporöskjulaga. Kúpt hald er á fætinum og tittur gengur út úr toppi hans. Innsiglið er 2,5 cm á hæð. Innsiglið var í eigu Sigríðar Guðmundsdóttur (f. 1892, d. 1977). Jón Andrésson (f. 1854, d. 1932) var föðurbróðir Sigríðar og fóstri hennar og hefur innsiglið tilheyrt honum upprunalega. Er innsiglið þá líklega frá síðari hluta 19. aldar eða fyrri hluta þeirrar 20. Jón var bóndi í Búðardal á Skarðsströnd á árunum 1889-1915, um það leyti er Sigríður var í fóstri hjá honum. Síðar var hann bóndi á Ballará. Sigríður var fædd að Gilsstöðum í Vatnsdal í Húnavatnssýslu. Foreldrar hennar voru Guðmundur Andrésson og Jónasa Þorsteinsdóttir. Sigríður var sett í fóstur til Jóns föðurbróður síns og konu hans, Guðrúnar Jónsdóttur Blöndal. Sigríður gekk í Kvennaskólann í Reykjavík ásamt vinkonu sinni Kristínu Vigfúsdóttur og bjó lengst af í Reykjavík. Sigríður starfaði meðal annars sem saumakona. Hún vann við karlmannafatasaum hjá klæðaversluninni Andersen & Lauth og starfaði í mörg ár hjá Vigfúsi Guðmundssyni. Einnig starfaði hún í fatageymslu Þjóðleikhússins. Eftir andlát vinkonu sinnar sinnti sonur Kristínar, Sverrir Jónsson (f. 1924, d. 1966), Sigríði og varði hún jólunum með fjölskyldu hans. Sigríður bjó í Aðalstræti í Reykjavík en árið 1967 brann húsið. Sólveig Þorsteinsdóttir, eiginkona Sverris, tók þá Sigríði inn á heimilið og sá um hana á meðan henni entist heilsan til, en var Sverrir þá látinn. Síðustu æviárin bjó Sigríður á dvalarheimilinu Grund. Gefendur eru Sólveig Þorsteinsdóttir (f. 1931) og dætur hennar Olga (f. 1953), Kristín (f. 1957) og Þórhildur (f. 1961) Sverrisdætur. Olga afhenti gripina fyrir þeirra hönd. Mæðgurnar gáfu einnig fleiri gripi úr fórum Sigríðar sem allir eru skráðir undir Þjms. 2020-52. Að auki fylgdi þeim innrömmuð ljósmynd af prúðbúnu fólki, þ.m.t. Sigríði Guðmundsdóttur. Myndin fór til myndasafns Þjóðminjasafnsins.

Aðrar upplýsingar

Ártal
1880 - 1920
Efni
Safnnúmer
Safnnúmer B: 2020-52-21
Stærð
2.3 x 1.8 x 2.5 cm Lengd: 2.3 Breidd: 1.8 Hæð: 2.5 cm
Aðfangategund
Undirskrár
Undirskrá: Munasafn
Efnisorð / Heiti
Efnisorð: Innsigli
Heimildir
Dagblaðið. (1977, 24. mars). Andlát, bls. 17. Sótt af: https://timarit.is/page/3068111