Til baka í leit
Veistu meira?

Askja, skráð e. hlutv.

1900 - 1950
Varðveitt hjá
Þjóðminjasafn Íslands
Gyllt blikkdós / askja / box undir penna. Dósin er bókarlaga, upphleypt mynstur skreytir botn, lok og kjöl. Á miðju loki dósarinnar er skjaldarmerki ensku krúnunnar. Þar fyrir ofan stendur: "D. LEONARDT & CO'S / BREVETTE S.C.D.C." Fyrir neðan skjaldarmerkið stendur: "BIRMINGHAM". Á botni stendur: "D. LEONARDT. & COS / NO 1346-F / UNIVERSAL. PEN". Efst á kilinum stendur "VOL II", þar fyrir neðan er dæld með hafti þar sem stungið er penna. Hespa er á miðri framhlið sem krækt er í gat á frambrún á loki. Í dósinni eru níu pennar fyrir pennastangir, af mismunandi gerð og frá ólíkum framleiðendum. Þrír þeirra eru framleiddir af D. Leonardt & Co., tveir af Macniven & Cameron Ltd., tveir af C. Brandauer & Co. og einn af Heintze & Blanckertz. Þá er einn merktur "EISENBAHN / FEDER". Smágert umslag er í öskjunni, á það er prentað með svörtu letri: "Stálpennar / Bóka- & Pappírsverzlun Ísafoldar / Pappír, Ritföng, Bækur, Nótur." Blikkdósin, pennarnir og umslagið sem þeir eru í eru líklega frá fyrri hluta 20. aldar. Blikkdósin var í eigu Sigríðar Guðmundsdóttur (f. 1892, d. 1977). Sigríður var fædd að Gilsstöðum í Vatnsdal í Húnavatnssýslu. Foreldrar hennar voru Guðmundur Andrésson og Jónasa Þorsteinsdóttir. Sigríður var sett í fóstur til Jóns Andréssonar föðurbróður síns og konu hans, Guðrúnar Jónsdóttur Blöndal. Sigríður gekk í Kvennaskólann í Reykjavík ásamt vinkonu sinni Kristínu Vigfúsdóttur og bjó lengst af í Reykjavík. Sigríður starfaði meðal annars sem saumakona. Hún vann við karlmannafatasaum hjá klæðaversluninni Andersen & Lauth og starfaði í mörg ár hjá Vigfúsi Guðmundssyni. Einnig starfaði hún í fatageymslu Þjóðleikhússins. Eftir andlát vinkonu sinnar sinnti sonur Kristínar, Sverrir Jónsson (f. 1924, d. 1966), Sigríði og varði hún jólunum með fjölskyldu hans. Sigríður bjó í Aðalstræti í Reykjavík en árið 1967 brann húsið. Sólveig Þorsteinsdóttir, eiginkona Sverris, tók þá Sigríði inn á heimilið og sá um hana á meðan henni entist heilsan til, en var Sverrir þá látinn. Síðustu æviárin bjó Sigríður á dvalarheimilinu Grund. Gefendur eru Sólveig Þorsteinsdóttir (f. 1931) og dætur hennar Olga (f. 1953), Kristín (f. 1957) og Þórhildur (f. 1961) Sverrisdætur. Olga afhenti gripina fyrir þeirra hönd. Mæðgurnar gáfu einnig fleiri gripi úr fórum Sigríðar sem allir eru skráðir undir Þjms. 2020-52. Að auki fylgdi þeim innrömmuð ljósmynd af prúðbúnu fólki, þ.m.t. Sigríði Guðmundsdóttur. Myndin fór til myndasafns Þjóðminjasafnsins.

Aðrar upplýsingar

Ártal
1900 - 1950
Efni
Safnnúmer
Safnnúmer B: 2020-52-11
Stærð
6.4 x 5.4 x 2.3 cm Lengd: 6.4 Breidd: 5.4 Hæð: 2.3 cm
Aðfangategund
Undirskrár
Undirskrá: Munasafn
Efnisorð / Heiti
Heimildir
Dagblaðið. (1977, 24. mars). Andlát, bls. 17. Sótt af: https://timarit.is/page/3068111