Til baka í leit
Veistu meira?

Ljósmyndarammi

1920 - 1960
Varðveitt hjá
Þjóðminjasafn Íslands
Útskorinn myndarammi úr viði. Í rammanum er ljósmynd af skeggjuðum karlmanni. Myndaramminn líkir eftir húsi eða hofi; útskornar súlur til hliðar við ljósmyndina standa á grunni og halda uppi þaki. Framhlið rammans er lökkuð eða máluð dökkbrún, bakhliðin er ljósleit. Svartmálað, opið hólf er aftan á rammanum þar sem ljósmyndinni er komið fyrir. Úr hólfinu gengur fótur sem heldur myndinni uppréttri. Fóturinn hefur brotnað og verið límdur aftur saman. Byggt á útliti rammans eru líkur á að hann sé frá tímabilinu 1920 til 1960. Myndaramminn var í eigu Sigríðar Guðmundsdóttur (f. 1892, d. 1977). Sigríður var fædd að Gilsstöðum í Vatnsdal í Húnavatnssýslu. Foreldrar hennar voru Guðmundur Andrésson og Jónasa Þorsteinsdóttir. Sigríður var sett í fóstur til Jóns Andréssonar föðurbróður síns og konu hans, Guðrúnar Jónsdóttur Blöndal. Sigríður gekk í Kvennaskólann í Reykjavík ásamt vinkonu sinni Kristínu Vigfúsdóttur og bjó lengst af í Reykjavík. Sigríður starfaði meðal annars sem saumakona. Hún vann við karlmannafatasaum hjá klæðaversluninni Andersen & Lauth og starfaði í mörg ár hjá Vigfúsi Guðmundssyni. Einnig starfaði hún í fatageymslu Þjóðleikhússins. Eftir andlát vinkonu sinnar sinnti sonur Kristínar, Sverrir Jónsson (f. 1924, d. 1966), Sigríði og varði hún jólunum með fjölskyldu hans. Sigríður bjó í Aðalstræti í Reykjavík en árið 1967 brann húsið. Sólveig Þorsteinsdóttir, eiginkona Sverris, tók þá Sigríði inn á heimilið og sá um hana á meðan henni entist heilsan til, en var Sverrir þá látinn. Síðustu æviárin bjó Sigríður á dvalarheimilinu Grund. Á ljósmyndinni er Sigurður "eldri" Finnbogason (f. 1830, d. 1911). Sigurður var ráðsmaður á Þverá í Spákonufellssókn 1860. Síðar var hann bóndi á Sæunnarstöðum í Hallárdal. Árið 1900 fluttist hann til Búðardals og bjó þar til æviloka. Jón föðurbróðir Sigríðar var bóndi í Búðardal á Skarðsströnd á árunum 1889-1915, um það leyti er Sigríður var í fóstri hjá honum. Mögulegt er að Sigríður hafi komist í kynni við Sigurð á þeim árum sem hún var í fóstri í Dalasýslu, en þó er óvíst hvernig þau þekktust. Ljósmyndina má einnig finna í Byggðasafni Dalamanna (nr. 143). Þar er hún sögð vera tekin af Jóni Guðmundssyni (f. 1870, d. 1944) ljósmyndara og bónda í Dalasýslu á árunum 1900-1912. Þar sem Sigurður fluttist til Búðardals árið 1900 er sennilegt að hún sé tekin á árunum 1900 til um 1910. Ramminn er mögulega yngri. Gefendur eru Sólveig Þorsteinsdóttir (f. 1931) og dætur hennar Olga (f. 1953), Kristín (f. 1957) og Þórhildur (f. 1961) Sverrisdætur. Olga afhenti gripina fyrir þeirra hönd. Mæðgurnar gáfu einnig fleiri gripi úr fórum Sigríðar sem allir eru skráðir undir Þjms. 2020-52. Að auki fylgdi þeim innrömmuð ljósmynd af prúðbúnu fólki, þ.m.t. Sigríði Guðmundsdóttur. Myndin fór til myndasafns Þjóðminjasafnsins.

Aðrar upplýsingar

Ártal
1920 - 1960
Efni
Safnnúmer
Safnnúmer B: 2020-52-5
Stærð
11 x 0 x 18 cm Lengd: 11 Hæð: 18 cm
Aðfangategund
Undirskrár
Undirskrá: Munasafn
Efnisorð / Heiti
Efnisorð: Ljósmyndarammi
Efnisorð: Myndarammi
Heimildir
Dagblaðið. (1977, 24. mars). Andlát, bls. 17. Sótt af: https://timarit.is/page/3068111