Stokkur, óþ. hlutv.
1940 - 1970
Varðveitt hjá
Þjóðminjasafn Íslands
Smástokkur / askja úr dökkum viði, mögulega mahóní. Stokkurinn er lakkaður á öllum hliðum nema á botni. Á hliðum hans og loki eru álímdir skrautsveigar úr ljósum viði. Fyrir miðju loksins er skjöldur og frá honum liggja laufasveigar, fjögurra blaða blóm er í hverju horni. Fjórir grænir filtpúðar eru undir botni stokksins, einn í hverju horni. Stokkurinn er klæddur með fjólubleiku flaueli að innan, bæði í botni og í loki. Umhverfis flauelið eru þrír tvinnar sem snúnir hafa verið saman, blár, rauður og hvítur. Stokkurinn er 15 cm á lengd, 11 cm á breidd og 6 cm á hæð. Stokkurinn virðist ekki ýkja gamall, líklega er hann frá tímabilinu 1940-1970.
Stokkurinn var í eigu Sigríðar Guðmundsdóttur (f. 1892, d. 1977). Sigríður var fædd að Gilsstöðum í Vatnsdal í Húnavatnssýslu. Foreldrar hennar voru Guðmundur Andrésson og Jónasa Þorsteinsdóttir. Sigríður var sett í fóstur til Jóns Andréssonar föðurbróður síns og konu hans, Guðrúnar Jónsdóttur Blöndal. Sigríður gekk í Kvennaskólann í Reykjavík ásamt vinkonu sinni Kristínu Vigfúsdóttur og bjó lengst af í Reykjavík. Sigríður starfaði meðal annars sem saumakona. Hún vann við karlmannafatasaum hjá klæðaversluninni Andersen & Lauth og starfaði í mörg ár hjá Vigfúsi Guðmundssyni. Einnig starfaði hún í fatageymslu Þjóðleikhússins. Eftir andlát vinkonu sinnar sinnti sonur Kristínar, Sverrir Jónsson (f. 1924, d. 1966), Sigríði og varði hún jólunum með fjölskyldu hans. Sigríður bjó í Aðalstræti í Reykjavík en árið 1967 brann húsið. Sólveig Þorsteinsdóttir, eiginkona Sverris, tók þá Sigríði inn á heimilið og sá um hana á meðan henni entist heilsan til, en var Sverrir þá látinn. Síðustu æviárin bjó Sigríður á dvalarheimilinu Grund.
Gefendur eru Sólveig Þorsteinsdóttir (f. 1931) og dætur hennar Olga (f. 1953), Kristín (f. 1957) og Þórhildur (f. 1961) Sverrisdætur. Olga afhenti gripina fyrir þeirra hönd. Mæðgurnar gáfu einnig fleiri gripi úr fórum Sigríðar sem allir eru skráðir undir Þjms. 2020-52. Að auki fylgdi þeim innrömmuð ljósmynd af prúðbúnu fólki, þ.m.t. Sigríði Guðmundsdóttur. Myndin fór til myndasafns Þjóðminjasafnsins.
Aðrar upplýsingar
Gefandi: Olga Sverrisdóttir
Sigríður Guðmundsdóttir, Notandi
Gefandi: Sólveig Þorsteinsdóttir
Gefandi: Kristín Sverrisdóttir
Gefandi: Þórhildur Sverrisdóttir
Sigríður Guðmundsdóttir, Notandi
Gefandi: Sólveig Þorsteinsdóttir
Gefandi: Kristín Sverrisdóttir
Gefandi: Þórhildur Sverrisdóttir
Ártal
1940 - 1970
Efni
Safnnúmer
Safnnúmer B: 2020-52-2
Stærð
15 x 11 x 6 cm
Lengd: 15 Breidd: 11 Hæð: 6 cm
Aðfangategund
Undirskrár
Undirskrá: Munasafn
Efnisorð / Heiti
Efnisorð: Stokkur, óþ. hlutv.
Heimildir
Dagblaðið. (1977, 24. mars). Andlát, bls. 17. Sótt af: https://timarit.is/page/3068111