Til baka í leit
Veistu meira?

Snittuspaði

1945 - 1960
Varðveitt hjá
Þjóðminjasafn Íslands
Snittuspaði úr silfri. Blaðið er flatt og dropalaga, blómaskreyti er greypt í framhlið þess. Jurtaskreyti er á skaftinu sem breikkar út í endann. Endi skaftsins er skreyttur bognu blómi á stilki með laufblöðum. Göt eru á milli stilks og laufblaða. Bakhlið spaðans er óskreytt. Á skaftinu miðju er greypt "PLÚTÓ H/F" og hreinleikastimpillinn "830S". Spaðinn er því gerður úr 83% hreinu silfri. Spaðinn er 17 cm að lengd, mesta breidd blaðsins eru 5 cm. Guðjón Bernharðsson (f. 1901, d. 1978) gullsmiður hóf rekstur sinn á Akureyri en árið 1945 fluttist fjölskyldan til Reykjavíkur. Þar stofnaði Guðjón silfursmiðjuna Plútó hf. sem hann og sonur hans, Gunnar Bernhard (f. 1930, d. 2017), áttu og ráku til ársins 1960. Gunnar lærði gullsmíði af föður sínum og lauk gullsmíðameistaraprófi í Pforzheim í Þýskalandi árið 1954. Þeir feðgar hönnuðu ýmis borðbúnaðarmynstur, má þar nefna mynstrið Heimir eftir Guðjón og mynstrið Gullstör sem Gunnar hannaði um 1950 og enn er framleitt. Árið 1960 seldu feðgarnir smiðjuna og sameinaðist hún þá Gull- og silfursmiðjunni Ernu hf. Nokkru fyrr, eða 1957, höfðu þeir stofnað Silfurbúðina á Laugavegi 55 og síðar útibú á Laugavegi 13. Verslunin flutti í Kringluna 1987 og var ein stærsta verslun sinnar tegundar hér á landi. Búðin var í rekstri fjölskyldunnar til 2000. Gefandi er Margrét Skarphéðinsdóttir (f. 1950). Snittuspaðann fékk hún frá frænku sinni og nöfnu, Margréti Nikólínu Lýðsdóttur (f. 1905, d. 2000). Margrét bjó alla tíð í Reykjavík. Hún var myndarleg húsmóðir og hugsaði vel um sitt silfur. Hún giftist Guðna Jónssyni (f. 1906, d. 1973) skósmiði, hjónin eignuðust enga afkomendur. Gefandi er skírð í höfuð á þeim hjónum og arfleiddi Margrét hana að spaðanum, ásamt fleiri silfurgripum sem afhendir voru safninu (Þjms. 2023-6-1, 2, 3, 5, 6, 7, 8, 9). Var ósk Margrétar sú að silfrið færi á safn eftir að frænka hennar notaði það ekki lengur.

Aðrar upplýsingar

Ártal
1945 - 1960
Efni
Safnnúmer
Safnnúmer B: 2023-6-4
Stærð
17 x 5 cm Lengd: 17 Breidd: 5 cm
Aðfangategund
Undirskrár
Undirskrá: Munasafn
Efnisorð / Heiti
Heimildir