Sverðsleifar

900 - 1000

Varðveitt hjá

Sverðshnappur frá víkingaöld, hefur verið silfurlagður. Gefendur Ásgeir Auðunsson og Guðbjörg Auðunsdóttir frá Minnivöllum í Landsveit, nú búsett á Hólavangi 9, Hellu. Fundinn í uppblæstri í Svínhaga fyrir 1930 af Eiríki bróður gefenda (1908-1930). Kom fram úr dóti eftir hann látinn. Dys hefur blásið upp í Svínhaga en alveg er óljóst um hvort hnappurinn er úr henni. Hann er 6,5 cm á breidd, festingarrauf upp í hann miðjan og festingarnaddur niður sitt hvorum megin við hana, þrískiptur. Hefur verið skreyttur silfursnúrum og sjást þess enn nokkur merki. Hnappurinn samsvarar nokkurn veginn að stærð sverðshnappi frá Keldum á Rangárvöllum, þjms. 8844, en sá er fimmskiptur. Ásgeir og Guðbjörg gerðu sér ekki grein fyrir hve mikið dýrmæti þau færðu til Skógasafns í þessum litla sverðshnappi. Kristján Eldjárn athugaði uppblásna beinagrind manns í Svínhaga 20. júní 1949, en tók ekki með sér til þjóðminjasafnsins og um þetta er allt óljóst. Hnappurinn virðist vera frá 10. öld.