Panta mynd Notkunarskilmálar

Permanentrúlla

1943

Varðveitt hjá

Þjóðminjasafn Íslands

Permanentspólur í viðarkassa, fyrir kalt permanent. Gulur málaður viðarkassi með lamir og læsingu úr málmi og handfang úr leðurlíki. Í kassanum eru 42 bleikar álspólur (7,5x2,5x 2,5 cm) með áföstum gúmmíböndum, ál pinnar (bláir 10 stk., bleikir 28 stk.), 24 klemmur úr áli. Einnig eru 54 gúmmíbönd í tveimur stærðum, 7,5x3 cm (43 stk.) og 7,5x 7 cm (11 stk.) í Mackintosh's sælgætisdós án loks. Á spólurnar er grafið: Permalette, á gúmmíböndum stendur máðum stöfum: Permalette. Innan á loki viðarkakassans stendur: Permalette Machineless, þar er einnig límdur miði sem á stendur:„Kalt permanent frá árinu 1943. Gjöf frá Fjólu Sigmundsdóttur hárgreiðslumeistara, fyrrverandi eiganda hárgreiðslustofunnar Píróla, Vesturgötu 2 í Reykjavík (1940-1952).“ Innan á botni kassans eru för eftir gúmmíbönd, hugsanlega brunaför. Í viðarkassanum er afrit af tilkynningu frá Verðlagsstjóra úr Morgunblaðinu, dagsetning tilkynningar er 23. 2.1949. Í tilkynningunni kemur fram hámarksverð sem viðskiptanefnd hefur ákveðið varðandi þjónustu hárskera, rakara og hárgreiðslukvenna (sjá fylgiskjal). Upplýsingar frá gefanda: Kassi með permanentspólum til að gera kalt permanent úr eigu Fjólu Sigmundsdóttur (f. 30.4.1922, d. 27.2.2004), hárgreiðslumeistara og fyrrum eiganda hárgreiðslustofunnar Píróla við Vesturgötu 2, Reykjavík (1940-1952). Fjóla gaf Iðnskólanum í Reykjavík þessar spólur til varðveislu, ekki er vitað hvenær. Árið 1938 fann Arnold F. Willatt upp fyrsta kalda permanentið. Nafnið vísaði til þess að hvorki voru notuð tæki né kemísk efni sem framkölluðu hita. Hárinu var rúllað upp á spólur og permanent-vökvinn látinn virka án hita. Að þessu loknu var hárið skolað. Því næst var kemískt efni með lágt pH-gildi, svokallaður festir, borið í hárið sem tók þá á sig lögun spólanna. Það tók sex til átta klukkustundir við stofuhita að liða hárið með þessu fyrsta kalda permanenti. Kalt permanent hefur verið endurbætt gríðarlega, í dag eru notuð mildari efni og kallast kalt permanent nú basískt permanent og tekur það yfirleitt 15-30 mínútur að virka.