Veggplatti
1980
Varðveitt hjá
Flugsafn Íslands
Viðurkenningarskjöldur til handa Gísla Sigurðssyni flugvélasmið og svifflugmanni. Gísli tók þátt í björgun herflugvélarinnar Northrop N-3PB, sem var í eigu Norsku flugsveitarinnar, úr Þjórsá árið 1979 en vélin sökk í ána 21. apríl 1943. Íslenska flugsögufélagið hafði forgöngu um björgun vélarinnar þar sem margir lögðu hönd á plóg. Þeirra á meðal var Gísli sem kom að verkefninu fyrir hönd Íslenska flugsögufélagsins. Flugvélin var flutt til Bandaríkjanna þar sem yfir 300 sjálfboðaliðar unnu að endurgerð hennar í verksmiðjum Northrop. Hún var síðan flutt til Noregs og afhent norsku þjóðinni aftur til varðveislu og eignar. Fyrir sinn þátt í björgun og endurgerð flugvélarinnar fékk Gísli þennan viðurkenningarskjöld.
Veggskjöldurinn er úr viði og á honum er málmplata sem á stendur: Fashioned from original material, this silhouette of the N-3PB Patrol Bomber commemorates your outstanding contribution to the restoration of Northrop’s first production airplane. Presented to Gisli Sigurdsson November 1980. Fyrir ofan málmskjöldinn er dökkblá leðurpjatla sem á er fest skuggamynd (e. silhouette) af umræddri flugvél og er búin til úr málmi úr flugvélinni.
Gísli Sigurðsson fæddist 26. janúar 1919. Hann lést 19. júlí 2003. Í æviágripi sem fylgdi minningargreinum um Gísla og birtist í Morgunblaðinu á útfarardegi hans segir:
"Hann lærði flugvéla- og svifflugusmíði í Þýskalandi og Svíþjóð, á árunum eftir seinni heimsstyrjöldina og var eini lærði svifflugusmiðurinn á Íslandi, en þau réttindi fékk hann með ráðherrabréfi. Hann tók einnig C-próf í svifflugi 1955. Gísli starfaði fyrir Svifflugfélag Íslands frá 1941-1980, sat í stjórn félagsins 1949-1978 og var gerður heiðursfélagi árið 1963. Hann starfaði á trésmíðaverkstæði Flugmálastjórnar frá 1980-1988, en frá 1988 og fram til síðasta dags vann hann fyrir Flugsögufélagið við að gera upp gamlar flugvélar. Meðal þeirra véla sem Gísli gerði upp á ferli sínum var Klemminn svokallaði, mótorvél sem þýskur sviffluguleiðangur kom með til Íslands, rétt fyrir seinna stríð." (Morgunblaðið, 29. júlí 2003: https://www.mbl.is/greinasafn/grein/744119/)
Umrædd flugvél, Klemminn, TF-SUX, er varðveitt og til sýnis á Flugsafni Íslands.
Aðrar upplýsingar
Ártal
1980
Efni
Safnnúmer
Safnnúmer B: 2021-14-4
Stærð
25.4 x 20.9 x 2 cm
Lengd: 25.4 Breidd: 20.9 Hæð: 2 cm
Staður
Núverandi sveitarfélag: Reykjavíkurborg, Reykjavíkurborg
Aðfangategund
Undirskrár
Undirskrá: Öndvegisstyrkur
Undirskrá: Almenn munaskrá
Efnisorð / Heiti