Forystusauður
Varðveitt hjá
Minjasafnið á Akureyri
Fjalla-Bensi, Benedikt Sigurjónsson f.9.4.1876 á skíðum með hund og sauð, í myndastofu Bárðar í Höfða. Ekki er víst hvort þetta eru hundurinn Leó og forystusauðurinn Eitill.
Gaman er að skoða þessa mynd nánar. Búið er að hafa mikið fyrir því að taka upp torf og setja á gólfið þannig að það er eins og Benedikt standi úti á skíðum með fjallasýn Mývatnssveitar að baki. En, til vinstri sést í hefilbekk Bárðar og til hægri sést í kistu. Myndastofa Bárðar var nefnilega líka smíðastofa hans í Höfða, þannig að hann vann sér inn fyrir lifibrauði í þessari stofu, bæði með smíðum og myndatökum.
Aðrar upplýsingar
Safnnúmer
Safnnúmer A: BS-601
Sýningartexti
Sýningin Ljósmyndari Mývetninga - mannlífsljósmyndir Bárðar Sigurðssonar frá upphafi 20. aldar.
Myndasalur Þjóðminjasafns Íslands 29. janúar - 2. maí 2011.
Mývetningur fer í göngur 1914
Fjalla-Bensi, Benedikt Sigurjónsson, var þjóðsagnapersóna í lifanda lífi. Hann var alla ævi vinnumaður í Mývatnssveit og fór margar eftirleitir á Mývatnsöræfum, jafnvel í nóvember og desember. Gunnar Gunnarsson skáld byggði skáldsöguna Aðventu á hrakningum hans í fjárleitum á jólanótt. Benedikt hefur stillt sér upp framan við málað baktjald Freymóðs Jóhannssonar listmálara frá Mývatni með Bláfjall í bakgrunni. Þegar Benedikt var orðinn gamall var hann spurður hvort hann hefði gengið á Herðubreið. Hann varð hálfhissa og svaraði að bragði: „Fé fór aldrei upp á Herðubreið“. Þar með átti hann ekki heldur erindi þangað. Frægustu skepnur Benedikts voru árið 1925, forystusauðurinn Eitill og hundurinn Leó, en ekki er vitað hvort dýrin á myndinni báru sömu nöfn. Hann stendur á skíðum og er með reku í hendi og poka á bakinu. (ILB)
Aðfangategund
Undirskrár
Undirskrá: Glerplötur - Bárður Sigurðsson
Flokkun
Efnisorð / Heiti
Heimildir
Þessi mynd er ekki skráð í Myndabók Bárðar.
Eftir fráfall Bárðar árið 1937 seldi Sigurbjörg Sigfúsdóttir ekkja hans Eðvarði Sigurgeirssyni ljósmyndara á Akureyri plötusafn hans, sem varðveitti það mjög vel í upprunalegum umbúðum Bárðar í húsi sínu, Möðruvallastræti 4 á Akureyri. Eftir fráfall Eðvarðs og Mörtu Jónsdóttur konu hans, komu börn þeirra Egill Eðvarðsson og Elsa Friðrika Eðvarðsdóttir safni Bárðar til varðveislu á Minjasafnið á Akureyri. Safnið samanstendur af um 850 glerplötum sem eru bæði mannamyndir og útimyndir af ýmsum toga. Ljóst er að þetta er ekki allt glerplötusafn Bárðar því fleiri myndir eru til eftir hann, sem ekki eru í þessu plötusafni.