Panta mynd Notkunarskilmálar

Lampi

1900 - 1930

Varðveitt hjá

Byggðasafn Skagfirðinga

A) Lampi, olíulampi, 59 cm á hæð (með glerinu), fóturinn er 16,5 cm á kant, ferkantaður. Fóturinn er úr málmi, blómaflúraður og skreyttur, málaður gylltur (gyllingin er sennilega nýleg). B) Lampinn stendur á viðarplatta. Plattinn er 24,5 cm á breidd, 28,5 cm á lengd og 2 cm á þykkt. Plattinn er seinni tíma viðbót og í hann er brennt: "HALLGRÍMUR THORLACIUS PRESTUR GLAUMBÆ 1898-1944. TOLLI. HARALDUR B STEFÁNSSON OG JÓHANNA GUNNARSDÓTTIR BÆNDUR BRAUTARHOLTI SKAGAF. 1944-1986. saga-olíulampans". Eftirfarandi texti fylgdi lampanum frá gefendum: "Lampi þessi var keyptur á uppboði sem haldið var í Hátúni þann 20. des 1944. Verið var að selja muni úr dánarbúi sr. Hallgríms Thorlacius, en hann var þjónandi prestur í Glaumbæjarprestakalli 1894-1935. Á uppboðinu keypti Haraldur B. Stefánsson, bóndi í Brautarholti, lampann á kr.46,00. Var lampinn jafnan nefndur Tolli eftir að hann kom í Brautarholt. Ekki er vitað hvenær sr. Hallgrímur eignaðist lampann, en vafalítið hefur hann skrifað margar sínar ágætu ræður við skin þessa lampa. Sr. Hallgrímur var fæddur 18. júlí 1864 og dáinn 31. október 1944. Lampi þessi er gefinn Byggðasafninu í Glaumbæ til minningar um Sr. Hallgrím Thorlacius- en hann skírði Brautarholtsbræður, Hauk, Stefán, Sigurð og Braga. Bragi er síðasta barn sem hann skírði, árið 1942, þá löngu hættur prestskap. Lampann afhenda þeir bræður Sigurður og Bragi Byggðasafninu til Varðveislu, í desember 2019. Bragi smíðaði stöðugleikaplattann undir lampann."