Panta mynd Notkunarskilmálar

Logbók

1950

Varðveitt hjá

Flugsafn Íslands

Logbók Björns Pálssonar flugmanns. Bókin er brún að lit, með harðri kápu og á henni stendur með gylltum stöfum: "Flugbók". Bókin er merkt Birni á titilsíðu bókarinnar en þar er einnig að finna símanúmer hans og undirskrift. Bókin er önnur logbók Björns. Fyrsta færsla bókarinnar er skráð þann 17.5.1950 og sú síðasta 4.7.1952. Björn flaug á þessum árum á vélum sínum TF-KZA af gerðinni KZ-III og TF-LBP af gerðinni Auster-5. Björn fæddist 10. janúar 1908. Hann var mikill áhugamaður um flug og var stofnfélagi í Flugmálafélagi Íslands og Svifflugfélagi Íslands sem bæði voru stofnuð árið 1936. Hann lærði svifflug og lauk C-prófi í því árið 1938. Árið 1937 hóf hann nám í vélflugi hjá Agnari Kofoed-Hansen og Birni Eiríkssyni. Hann lauk einliðaprófi 1938 og var fyrstur til að hljóta flugréttindi sem veitt voru hér á landi. Þá var hann einnig fyrstur til að fá einkaflugmannsréttindi á Íslandi en þau fékk hann 1939. Björn starfaði við bifreiðaakstur og húsbyggingar þar til að hann sneri sér að atvinnuflugi. Árið 1948 keypti hann flugvélina TF-KZA af gerðinni KZ-III. Fyrstu árin vann hann við byggingarvinnu meðfram fluginu en 1951 starfaði hann eingöngu við flug. Björn starfaði í Rannsóknarnefnd flugslysa frá því að hún var stofnuð 1. september 1968 til æviloka. Björn fór fyrsta sjúkraflugið sitt á TF-KZA árið 1949. Tveimur árum síðar keypti hann flugvélina TF-LBP af gerðinni Auster-5 og 1954 keypti Björn TF-HIS, Cessna 180, sem var sérstaklega búin til sjúkraflugs með sérstökum sjúkrabörum. Naut Björn stuðnings Slysavarnafélags Íslands við kaupin á vélunum tveimur. TF-HIS flaug um 150 sjúkraflug á ári þau 20 ár sem hún var í notkun. Á veturna var hún búin skíðum. Árið 1960 keypti Björn öflugri sjúkraflugvél af gerðinni Beech Twin Bonanza, TF-VOR. Eftir það var TF-HIS aðallega notuð þegar aðstæður voru þannig að TF-VOR gat ekki athafnað sig. Björn stofnaði Flugþjónustuna hf. ásamt Flugfélagi Íslands árið 1965 og var framkvæmdastjóri hennar til dauðadags. Björn fórst í flugslysi í Búrfjöllum þann 26. mars 1973. TF-HIS er í eigu Flugsafns Íslands og er hún til sýnis á safninu.