Mynd: Byggðasafn Skagfirðinga

Fatageymsla

1859

Varðveitt hjá

Kista úr furu, geirnegld. Kistan er með venjulegu lagi, kassinn um 99,5 x 49 cm efst og hæð frá gólfi á lok 55,5 cm. Botn og lok ná út fyrir kassann og á brúnir hans eru negld járn til styrktar. Hægra megin í kistunni er handraði með strikhefluðu loki sem leikur á tappahjörum. Rúmlega 3 cm háir fætur eru undir hornum kistunnar, gerðir úr kubbum, en munu ekki upprunalegir. Lokið er kúpt 104,5 x 52,5 cm, strikheflað á fram- og bakbrún. Lamir eru úr járni, svo og skrá og lykill (10,07 cm langur) og er læsingajárnið einungis eitt. Járnhöldur eru hvor á sínum gafli. Kistan er öll máluð utan; grunnlitur er rauðleitur og við hornin að framan eru svartir, lóðréttir listar svo og svartir bekkir þvert yfir lokið, tveir yst til endanna og tveir innar, og einnig er svartur bekkur meðfram hliðajöðrum loksins. Á miðri framhlið er lóðréttur svartur bekkur og allir eru þessir svörtu bekkir hvítir á jöðrum. Á framhlið eru málaðir vafningar og rósir með hvítu, grænu, bláu og svörtu og vinstra megin er málað með svörtu í hvítan grunn orðið: Aar og hægra megin á sama hátt: 1859. Lok hefur verið málað svipað og framhliðin, en málningin er nú mjög afmáð, einkum að framanverðu. Gaflar og bak eru eingöngu rauð. Kistan er útlend, norsk eða dönsk, og í góðu standi. Lítil rifa er þó á miðfjöl loksins hægra megin og virðist alltaf hafa verið. Hægri lömin er farin að losna á nöglunum. Kistan var síðast í búi Salóme Jónasdóttur og Björns Finnssonar á Stóru-Seylu og er komin þaðan til safnsins en óvíst hvenær.