Mynd: Byggðasafn Skagfirðinga

Fatakista

1852

Varðveitt hjá

Fatakista Sigurlaugar í Ási. Stærð: Lengd 91 cm, hæð 47 cm og breidd á kistuloki er 47 cm. Breidd á kistu efst er 44 cm. Rauðmáluð með svörtum brúnum og hornum. Á svarta litinn eru málaðar gular og grænar rendur. Á loki eru tveir sveigar, málaðir grænir, laufblöð, með gulum blómum í annan er skrifað: SG 1852 og hinn SG 1987, sem mun vera ártölin þegar annars vegar Sigurlaug Gunnarsdóttir í Ási eignaðist kistuna og hins vegar þegar Sigurlaug Guðmundsdóttir frá Ási lét mála kistuna upp. Um kistuna miðja er svart belti með gulum og grænum röndum frá loki, þvert á það og niður á lás og lykil og niður úr að framan. Sitt hvoru megin við þetta svarta belti, að framan, eru blómstur. Græn og svört blöð með gulum og bláum blómum. Ekki er vitað hver málaði kistuna 1987 en Sigurlaug Guðmundsdóttir, sem gefur hana til safnsins til minningar um langömmu sína, sagði hana næstum alveg eins og hún var þegar hún fékk hana. Lykill og eyrun eru endursmíðuð, fínir gripir og lásinn er í góðu lagi. Í kistunni er handraði, vinstra megin. Hann er með loki.