Panta mynd Notkunarskilmálar

Höfðaletur

1843

Varðveitt hjá

Byggðasafn Skagfirðinga

Prjónastokkur úr brenni með göflum úr eik og tappalæsingu. Hann er um 26 cm langur, 5,4 cm breiður og hæð á lok um 6,3 cm, en gaflar ná hærra upp um miðju og þar 7,5 cm háir. Eru sýlingar inn í hliðar annars gafltappans, þar er lokinu smeygt inn í, en lokið fellur ofan yfir hinn gafltappann og þeim megin er læsingin. Annað tippið er aflangt og er lokunni rennt til með því, hitt tippið er ferningslaga og nær miðjunni. Neðan á því er kringla, undir lokinu, og er skarð í hana á einum stað þar sem lokan gengur inn í, og verður henni ekki þokað úr nema kringlan viti á vissan hátt, en henni er hægt að snúa með tappanum (sbr. kistill nr. 10). Kvarnað er úr tippinu og kringlan laus á. Ofan á lokið eru skorin laufblöð, smákringlur og tíglabekkir, og á gafla tíglaskraut. Á hliðar er skorið með höfðaletri: stockurine / rstatinmst (þ.e. Stokkurinn er státinn með, stöfum snyrtilegum). Á botninn er skorið með skrifstöfum: ANO 1843 I B D. Stokkurinn er eir- og látúnsnegldur. Eitt hornið er brotið af lokinu en endurnýjað og spengt með látúnsspöng, en losaralegt nú. Stokkurinn er ágætlega skorinn. Skurðurinn er með handbragði Hjálmars skálds Jónssonar í Bólu, enda mun stokkurinn vera gerður af honum (sbr. snældustólinn BSk-478). Óvíst hvaðan stokkurinn er kominn eða hvenær hann kom til safnsins. Líklega þó kominn frá Írafelli samkvæmt eftirgrennslan Sigríðar Sigurðardóttur.