Panta mynd Notkunarskilmálar

Flagg

1930

Varðveitt hjá

Byggðasafn Skagfirðinga

Fáni eða flagg, með Byggðamerki Skagafjarðar. Grunnlitir eru gulur og blár, á litaskilum er mynd af Drangey og Kerlingunni, klettardranga hægra megin við eyjuna. Undir eyjunni krossast sverð og biskupsbagall, bagallinn liggur í forgrunni (sjá nánari lýsingu hér að neðan). Fáninn er með óreglulegu lagi, hann er hengdur upp á gulu reipi á skammhlið sem vísar upp (ekki er ætlunin að flagga fánanum á stöng, heldur frekar að hengja upp). Á neðri skammhlið eru þrír oddar eða horn sem vísa niður, hálfir til hliðanna og heill fyrir miðju. Á horn-endunum er einn dúskur úr málmþræði, þrír alls, og á milli þeirra meðfram allri neðstu brún er gyllt kögur úr málmþræði. Fáninn er myndofinn úr merceríseraðri bómull og útlínur sverðs og bagals ásamt skrauti á sverðinu er saumað með kontorsting. Fáninn er 87 cm á breidd og 132 cm á lengd (fram á odda), þar að auki eru dúskarnir 22 cm að lengd, svo lengd með dúskum er 154 cm alls. Stöngin sem fáninn hangir niður úr er 135 cm á lengd. Lilja Sigurðardóttir (1884-1970) í Ásgarði (Víðivöllum) saumaði þennan fána fyrir Alþingishátíðina árið 1930. Sýslunefndin fól henni að skreyta tjaldbúð Skagfirðinga á hátíðinni. „Þau skilyrði setti jeg, að fá að hafa óbundnar hendur með tilhögun skreytingarinnar (...) og var að því gengið“ (Lilja Sigurðardóttir í Hlín 41.tbl.1959, bls. 95). Tilmæli höfðu komið um það frá stjórnvöldum að hver sýsla bæri sitt eigið merki í skrúðgöngu við upphaf hátíðarinnar. Hugmyndasmiður þess var Lilja. Á því eru táknmyndir fyrir Skagafjörð. Drangey og kerlingin minna á þjóðsöguna um nátttröllið sem dagaði uppi og á „vorbæruna“ sem alltaf gaf fugl, egg og fisk í bú á hverju vori. Sverðið og biskupsbagallinn tákna söguleg átök þegar menn börðust gegn vaxandi veldi kirkjunnar á miðöldum. Það að bagallinn liggur yfir sverðinu táknar að orðið sigraði vopnið. Hugmyndin var send Tryggva Gunnarssyni listmálara sem gaf góða ábendingar. Dúkinn óf Sigrún Jónsdóttir (1911-1986) á Flugumýri en Lilja vann fánann að öðru leyti. Hann var tákn Skagafjarðarsýslu til 1989. Söfnin, sem sýslan setti á fót, notuðu hann í mörg ár.