Ljár

1900 - 1940

Varðveitt hjá

Byggðasafn Skagfirðinga

Torfljár, úr heilu járni (einjárnungur), skammorfið er úr heilu tré, brotið af öðru haldinu. Breidd: 28 cm. Haldlengd á heila haldinu er 21 cm. Ljáblaðið er 50 cm, fremur þykkt, bogið og brotið fremst. Á skammorfinu eru járnpynnur báðu megin þar sem járnið gengur í gegn og er fest með splitti. Um þennan torfljá segir gefandi, Andrés H. Valberg: „frá Helga Arasyni bónda á Fagurhólsmýri. Sá sem risti torf, kraup niður á hægra hné, brá ljánum á jörðina og risti, færði sig og risti þar til torfan var orðin hæfilega löng. Þá var rist eins á móti og lá þá torfan laus. Næsta torfa var rist þar við hliðina. Fyrsta torfan hét Flagmeri. Næstu torfur hétu grastorfur. Þar sem torfrista var góð voru skornar aðrar torfur í sama flaginu, farið niður. Voru þær kallaðar undanfláttur, þær gátu verið breiðari. Þannig var reiðingur tekinn. Ekki voru notaðar grastorfur í reiðing. Torfurnar voru hringaðar upp jafnóðum og látið síga úr þeim og léttast. Þá voru þær fluttar á hestum, þvert yfir bakið og héngu endar við jörðu. Svona ljáir voru einnig notaðir til að snyrta klömbruhlaðinn vegg.”