Bókaskápur

1840 - 1870

Varðveitt hjá

Veggskápur (í innkaupaskrá Árna Sveinssonar kallaður bókaskápur) úr furu. Skápurinn var upphaflega allur trénegldur, og er stærðin 63 x 82 cm og dýptin um 30,5 cm. Framhliðin er öll útskorin, en hún er gerð úr tveimur þverfjölum, efst og neðst, og tveimur lóðréttum fjölum á milli, til hliðanna. Í miðjunni er svo hurð 26 x 59,5 cm. Á þverfjalirnar eru útskornir blaðteinungar og efri fjölin laufsöguð, og á hvora hliðarfjöl eru skornir átta hringir, sem eru tengdir eins og keðja, en efstu og neðstu hringirnir sjást ekki allir. Á hurðina er skorið með höfðaletri: hvarse / mstoc / kinaudg / rundaie / igusini / stales / taianid / anno 1843. Skápurinn er prýðisvel skorinn allur, en letrið er erfitt aflestrar og önnur og þriðja síðasta línan líklega bundnar. Árni Sveinsson segir í innkaupaskrá sinni að á hurðinni standi: Hver sem stokkinn auðgrund á í eigu sinni, blessun hennar aldrei linni - en ekki er unnt að lesa seinni línuna út úr skammstöfunin. Rammafjalirnar á framhlið hafa verið málaðar rauðar, en hurðin græn (sést þó í rautt í þverskorum milli leturlína), en málningin er nú farin af nema niðri í letrinu, og e.t.v. aldrei málað nema þar. Hillur eru tvær í skápnum, en lamir eru farnar af svo og skrá, en gömul lamaför sjást utan á vinstri hlið. Hurðin er sprungin langsum í miðju svo og vinstri lóðrétta fjölin á framhliðinni. Skápurinn er talinn gerður af Hjálmari Jónssyni skáldi í Bólu, en eigi mun það vera öruggt, og ekki er skurðurinn líkur skurðinum á þeim tveimur skápum eftir Hjálmar sem eru í Þjóðminjasafni og Vídalínssafni. Skápurinn er fenginn til safnsins frá Friðbirni Snorrasyni bónda Brekkukoti, Efribyggð 1943.