Maður

01.01.1870 - 01.01.1880

Varðveitt hjá

Páll Pálsson f. 17. ágúst 1848 í HÖRGSDAL á Síðu. Þar bjó þá föðurafi hans Páll Pálsson prófastur (1797-1861). Foreldrar hans voru hjónin Páll „snikkari“ Pálsson prófasts á Prestbakka og konu hans frú Guðrúnar Guðjónsdóttur, sem var alsystir Péturs Guðjónsens tónlistarmanns, söngkennara og svo organleikara við dómkirkjuna í Reykjavík. Páll Pálsson lærði undir skóla hjá föðurbróður sínum, séra Páli Pálssyni á Prestsbakka, sem var kunnur gáfu- og mælskumaður. Síðan hóf Páll nám í Lærða skólanum haustið 1866, þá 18 ára gamall. Fjóra næstu vetur stundaði hann námið þar og stefndi að stúdentsprófi. En hann gafst upp eftir þessa fjóra vetur. Næstu vetur bendir margt til þess, að hann hafi stundað barnakennslu á vetrum en unnið við búskap hjá bændunum í Vestur-Skaftafellssýslu á sumrum. Fyrsta ferð yfir Vatnajökul, sem fullar heimildir eru um, er ferð Englendingsins W.L. Watts árið 1875. Lagði hann upp frá Núpsstað og kom af jökli hjá Kistufelli eftir 12 daga ferð. Fylgdu honum 5 Íslendingar og meðal þeirra var Páll Pálsson jökull, en það viðurnefni fékk hann eftir þessa ferð. W.L. Watts nefndi Pálsfjall í Vatnajökli eftir Páli Pálssyni, eins og lesa má um í bókum Watts. Haustið 1874 verður það að ráði, að Páll Pálsson flyzt til Vestmannaeyja og gerðist þar barnakennari. Þeir félagar fóru síðan aðra ferð á jökulinn síðar. Eftir fráfall eiginkonunnar mun Páll Pálsson jökulfari, eins og hann nefndi sig oft sjálfur, hafa haft ofan fyrir sér með ferðamennsku á sumrum og barnakennslu í einhverri mynd á vetrum. Árið 1903 flyzt hann að Eyvindarhólum undir Eyjafjöllum og síðan að Hlíð til Páls bónda, hálfbróður síns. Á árunum 1905-1908 á Páll jökulfari heima á Höfðabrekku í Hvammshreppi. Er hann þá öðrum þræði a.m.k. sýsluskrifari hjá Björgvin sýslumanni Vigfússyni. - Síðar gerðist hann aftur heimiliskennari hjá bróður sínum í Hlíð og andaðist þar 21. júlí 1912.