Barn

29.07.1972

Varðveitt hjá

Bændadagurinn í Eyjafirði 1973, sem Búnaðarsamband Eyjafjarðar stóð fyrir. Afhending verðlauna fyrir snyrtileg býli. „Bændadagur Eyfirðinga var haldinn á Árskógsströnd á sunnudaginn og fóru hátíðahöldin að mestu fram undir berum himni á snyrtilegri grasflöt við skóla og samkomuhús sveitarinnar, Árskóg. Veður var hið fegursta, sól og hiti. En á þessum stað var fyrsti Bændadagurinn haldinn, 1957, og þá flutti Davíð Stefánsson frá Fagraskógi ræðu, sem hreif alla viðstadda og Steingrímur Steinþórsson, fyrrum forsætisráðherra, flutti þar einnig ágæta ræðu. Að þessu sinni setti formaður Búnaðarsambands Eyjafjarðar, Sveinn Jónsson, hátíðina, en búnaðarsambandið og samband ungmennafélaga hafa jafnan séð um þessi hátíðahöld. Jónas Jónsson, aðstoðar landbúnaðarráðherra, flutti ræðu dagsins og er hennar getið á öðrum stað. Þá sungu þeir Viktor Guðlaugsson skólastjóri á Stórutjörnum og Bragi Vagnsson fimleikakennari við sama skóla. Frú Sigríður Schiöth söng gamanvísur og Ingva Rafns-börn frá Akureyri skemmtu með söng og gítarleik. Ármann Dalmannsson, fyrrv. formaður búnaðarsambandsins, var heiðraður með góðri gjöf frá samtökunum og þakkaði hann með snjöllu kvæði. Þá veitti búnaðarsambandið verðlaun fyrir snyrtilega umgengni. Lampann, farandgrip, hlutu hjónin Jón Kristjánsson og Guðrún Kristjánsdóttir, Fellshlíð. Viðurkenningar hlutu Þorgils Gunnlaugsson og Olga Steingrímsdóttir, Sökku, Jón Kristinsson og Sonja Emma Kristinsson, Ytrafelli, Birgir Þórðarson, Öngulsstöðum II og Eggert Davíðsson og Ásrún Þórhallsdóttir, Möðruvöllum II, ásamt verðlaunum frá Skógræktarfélagi Eyjafjarðar. Á íþróttavellinum, skammt frá skólanum, kepptu heimamenn við ungmennafélagið Dagsbrún í Glæsibæjarhreppi í knattspyrnu og ýmsar aðrar íþróttir fóru fram, en að síðustu var dansleikur haldinn í Víkurröst á Dalvík og fór hann vel fram. Sveinn Jónsson afhenti verðlaun og viðurkenningar fyrir snyrtilega umgengni á sveitabæjum ... Hin ýmsu skemmtiatriði úti, nutu sín einkar vel, meðal annars vegna hins hagstæða veðurs, og fólki leið vel í hinum notalega sumarhita, sem einkennt hefur júlímánuð hér á Norðurlandi. Bændadagurinn er ekki baráttudagur í venjulegum skilningi, heldur á hann að vera gleði- og sameiningardagur stéttarinnar, og þannig hefur hann verið. Vera má, að hann sé þegar kominn í of fastar skorður, þótt ætíð sé reynt að vanda til undirbúnings svo sem kostur er. Í þetta sinn ríkir mikil bjartsýni í bændastéttinni, vegna hinnar óvenju hagstæðu veðráttu undanfarið. Naumast er hægt að segja, að dropi hafi komið úr lofti síðan byrjað var að heyja og eru flestir bændur langt komnir með heyskap sinn og nokkrir búnir. Heyfengur er víðast mikill og hey óvenjulega vel verkuð.“ Úr Degi 1. ágúst 1973 https://timarit.is/files/19067033