Til baka í leit
Veistu meira?

Stokkabelti

1800 - 1820
Varðveitt hjá
Þjóðminjasafn Íslands
Stokkabelti úr silfri. Beltið samanstendur af beltispari og níu stokkum (ellefu ef stokkarnir í beltisparinu eru taldir með), sem öll eru skreytt gröfnu blómamynstri. Skrautið á stokkunum níu er eilítið frábrugðið skrautinu á beltispörunum. Stokkarnir eru nú hlekkjaðir saman með S-lykkjum en göt á stokkunum gefa til kynna að þeir hafi upphaflega verið saumaðir á linda (flauelslinda). Beltið er úr eigu Ragnhildar Halldórsdóttur Skeoch (f. 1919, d. 2015). Hún fékk að að gjöf frá frænku sinni, Guðrúnu Ásgeirsdóttur (f. 1868, d. 1948) í Winnipeg í Kanada, sennilega árið 1944. Guðrún mun hafa fengið beltið að gjöf frá Oddnýju Ásgeirsdóttur (f. 1865, d. 1953) systur sinni í þakklætisskyni fyrir eitthvað. Oddný fór ung til Vesturheims og giftist þar. Beltið er í mjög góðu ástandi. Áður átti Ragnhildur Ólafsdóttir (f. 1833, d. 1908) beltið, en hún var langamma Ragnhildar Halldórsdóttur Skeoch. Hún var fædd í Bakkakoti í Bæjarsveit og var síðar húsfreyja á Lundum í Stafholtstungum. Þorbjörn ríki Ólafsson (f. 1746, d. 1827) bóndi og gullsmiður á lundum er talinn hafa smíðað beltið. Ragnhildur Ólafssdóttir giftist 1853 Ólafi Ólafssyni (f. 1829, d. 1861). Foreldrar hans voru Ólafur Þorbjörnsson (f. 1786, d. 1834) á Lundum og kona hans Ragnhildur Hinriksdóttir (f. 1796, d. 1843). Ólafur var sonur fyrrnefnds Þorbjörns ríka, gullsmiðs og bónda á Lundum.  Ragnhildur Ólafsdóttir og Ólafur bjuggu á Lundum þar tl Ólafur lést árið 1861. Ragnhildur giftist síðar Ásgeiri Finnbogasyni (f. 1814, d. 1881) og bjuggu þau einnig á Lundum. Á meðal barna Ragnhildar af fyrra hjónabandi var Ragnhildur Ólafsdóttir (f. 1854, d. 1928) sem giftist Pjetri Kristinssyni, bónda í Engey. Þau voru amma og afi Ragnhildar Halldórsdóttur Skeoch. Af síðara hjónabandi átti Ragnhidur Ólafsdóttir þrjár dætur, þar á meðal Guðrúnu Ásgeirsdóttur (f. 1868, d. 1948), konu Finns Jónssonar fyrrum ritstjóra Lögbergs í Winnipeg. Guðrún er hálfsystir Ragnhildar Ólafsdóttur í Engey, ömmu Ragnhildar Halldórsdóttur Skeoch.  Gripirnir nr. Þjms. 2016-43 eru allir úr dánarbúi Ragnhildar Halldórsdóttur Skeoch. Hún var fædd árið 1919 og lést 2015. Hún fór árið 1940 til náms í Winnipeg í Kanada og bjó þá hjá frænku sinni, Guðrúnu Ásgeirsdóttur (f. 1868, d. 1948) og Finni Jónssyni sem var ritstjóri Lögbergs í Winnipeg. Ragnhildur giftist síðar Lawrence A. Skeoch (f. 1910, d. 2001). Hún bjó í yfir sex áratugi í Kanada og um tíma í Bandaríkjunum. Hún var barnlaus. Stokkabeltið fannst þegar farið var í gegnum dánarbú Ragnhildar, ásamt handskrifuðum upplýsingum um tilurð þess, þær sem skráðar hafa verið hér að framan. Einnig var leitað frekari upplýsinga í fleiri heimildum til að fá gleggri mynd af sögu stokkabeltisins.* Gefendur gripanna eru erfingjar Ragnhildar: Ragnhildur Þórarinsdóttir (050153-4019), Guttormur Þór Þórarinsson (310856-7469), Margrét H. Þórarinsdóttir (031058-4739), Halldór Teitsson (170752-3849), Guðrún Helga Teitsdóttir (230555-4279), Ágúst Már Gröndal (181085-3559) og Anna Guðný Gröndal (241188-2059). *Þær heimildir eru: Halldór Daníelsson (1933). Ásgeir Finnbogason og Ragnhildur Ólafsdóttir hjón á Lundum. Óðinn, 1-7 tbl., 12-14. Íslendingabók, sótt 1. júní 2016 af https://islendingabok.is/. Ragnhildur Pjétursdóttir (1949). Guðrún Ásgeirsdóttir Johnson, Winnipeg: Minning - 1868-1948. Hlín, 1. tbl., 31. árg., 16-19.

Aðrar upplýsingar

Ártal
1800 - 1820
Efni
Safnnúmer
Safnnúmer B: 2016-43-1
Stærð
66.1 x 4 cm Lengd: 66.1 Breidd: 4 cm
Aðfangategund
Undirskrár
Undirskrá: Munasafn
Efnisorð / Heiti
Efnisorð: Stokkabelti