Mannabein
1910 - 1920
Varðveitt hjá
Þjóðminjasafn Íslands
Mannsbein: annars vegar efsti hluti höfuðkúpu (a), afsagaður, og hins vegar eitt rifbein (b). Saga beinanna er sú „að Hallgrímur Þorsteinsson [f. 1864, d. 1952], organisti og söngkennari, réði sig sem húsvörð við Menntaskólann í Reykjavík á árunum kringum 1920. Hann átti þá gamalt skrifborð, sem hann lánaði tveimur ungum læknanemum. Þegar þeir skiluðu borðinu voru umrædd bein í einni skúffu borðsins. Hallgrímur bað þessa ungu menn að sækja beinin, sem þeir lofuðu að gera en gerðu ekki. Beinin hafa því legið í þessu skrifborði, allar götur síðan. Það voru ströng fyrirmæli frá Hallgrími að ekki mætti fjarlægja beinin. Borðið endaði í eigu [gefanda] á áttunda áratug síðustu aldar, en fer nú í vörslu annars staðar. Því viljum við losa okkur við beinin og höfum beðið [Þjóðminjasafn Íslands] að taka við þeim til varðveislu.“ (Upplýsingar fengnar frá gefanda).
Beinin eru þétt og í góðu ástandi. Þó hefur rifbeinið þornað lítið eitt til endanna. Sem fyrr segir er höfuðbeinið efsti eða efri hluti höfuðkúpu, afsagaður. Sagað hefur verið í ennisbeinið en þó nær sú rauf ekki í gegnum beinið. Ekki er hægt að segja hversu gömul beinin eru, né heldur hvort þau tilheyra sömu manneskju. Höfuðbeinið ber þó ýmis merki þess að frekar sé um höfuðbein úr karlmanni að ræða en kvenmanni. Augljóslega er það úr fullorðnum einstaklingi. Á innanverðu beininu má sjá nýjar beinmyndanir sem benda til einhvers konar sjúkdóms. Á utanverðu beininu má ennfremur sjá merki um góðkynja krabbameinsæxli. Rifbeinið er einnig úr fullvöxnum einstaklingi, sem þó hefur dáið ungur. Á því eru einnig merki um beinmyndanir. Á innanverðu höfuðbeininu eru lítilsháttar óhreinindi en þó verður að teljast ólíklegt að beinin hafi nokkurn tíma legið í jörðu. Þvermál höfuðbeinsins er 13,4 x 18,4 cm og hæðin er 7,7 cm. Rifbeinið er 21,2 cm langt.
Aðrar upplýsingar
Gefandi: Margrét Sigríður Einarsdóttir
Ártal
1910 - 1920
Efni
Safnnúmer
Safnnúmer B: 2015-57
Aðfangategund
Undirskrár
Undirskrá: Munasafn
Efnisorð / Heiti
Efnisorð: Mannabein