Kjóll
1949
Varðveitt hjá
Þjóðminjasafn Íslands
Árshátíðarkjóll úr versluninni Gullfossi, kjólaverslun Reykjavík, röndóttur, ermalaus, aðsniðinn í mittið en gengur út móts við mjaðmir. Hálsmálið er í V bæði að framan og aftan og að framanverðu er kjóllinn hnepptur með mörgum hnöppum, alveg niður að pilsi. Þó nokkrir hnappanna hafa glatast og einnig eru margar hneslanna orðnar slitnar. Í kjólnum er ennfremur eilítið um föst óhreinindi en annars er hann í nokkuð góðu ástandi.
Kjóllinn er úr eigu Guðrúnar Tómasdóttur söngkonu. Hún bar kjólinn meðal annars á árshátíð í Sjálfstæðishúsinu við Austurvöll árið 1949. Þar tróð hún upp ásamt þremur öðrum söngvurum í árshátíðarkvartett. Carl Billich lék undir á píanó. Þetta var áður en Guðrún hélt utan til söngnáms. Í kvartettinum, sem kom víða fram, voru, auk Guðrúnar, Þuríður Pálsdóttir, Magnús Jónsson tenór og Kristinn Hallsson.
Gullfoss, saumastofa og kvenfataverslun, var lengst af til húsa í Aðalstræti 9 í Reykjavík. Lengi vel var allt framleitt á saumastofu verslunarinnar og um tíma unnu um 30-40 stúlkur þar og m. a. voru fengnir sníðameistarar frá dönskum tískuhúsum til að sníða fyrir verslunina.
Með skráningunni hér er ljósmynd af árshátíðinni 1949, þar sem meðlimir kvartettsins sitja til borðs, ásamt fleirum. Á myndinni eru, auk fjögurra meðlima kvartettsins (Guðrún er þar klædd kjólnum röndótta*): Carl Billich, Knútur R. Magnússon, Ásgeir Hallsson og Hjördís Þorbjörg Sigurðardóttir (kona Kristins). Myndin er í eigu gefanda.
*Á myndinni klæðist Guðrún kjólnum „öfugt“, þ. e. hnapparnir snúa aftur. Þó augljóst sé á sniði kjólsins að hnapparöðin eigi að snúa fram (á þeirri hlið eru brjóstsaumar og á hinni hliðinni er merkimiði verslunarinnar Gullfoss), má þó nota hann á báða vegu og Guðrún hefur greinilega kosið í þetta sinnið að snúa honum á þennan veg.
Aðrar upplýsingar
Ártal
1949
Safnnúmer
Safnnúmer B: 2015-68-1
Aðfangategund
Undirskrár
Undirskrá: Munasafn