Til baka í leit
Veistu meira?

Minningartafla, í kirkju

1858
Varðveitt hjá
Minjasafn Austurlands
Minningartafla um Gunnlaug Þorkelsson (f.1787, d.1851), bónda á Eiríksstöðum á Jökuldal. Taflan er í djúpum útskornum gylltum tréramma. Á bakhlið er skrifað með lit "Forfærdiget að A.W. Österberg i Köbenhavn 1859". Áletrun töflunnar er svohljóðandi: "Heiður, vegsemd og frið skal sá öðlast sem gott gjörir. Rómv. 2, 20. Því skal hér minnast Gunnlaugs bónda Þorkelssonar er fæddist 12ta dag maímánaðar 1787, Giptist á 27da aldursári 1814 jónfrú Guðrúnu Finnsdóttur. En hneig til moldar 4da dag maímánaðar 1851 á 64ða aldursári. Í sínu heiðursverða hjónabandi varð honum 10 barna auðið. Af þeim lifa enn 2 dætur, hin 8 höfðu að fagna komu föður síns í sælla heimi. Hann bar af flestum sinnar stéttar samtíða mönnum. Því trú og skyldu-rækt voru í fyrirrúmi hjá honum. Hjartalagið var ástríkt, hreinskilið og  staðfast. Tilfinningarnar næmar, gáfurnar ljósar og hugvitið skarpt. Dagfarið stillt, viðfeldið og reglubundið. Breytni framkvæmdarsöm og skynsamleg. Öll hegðun - samanlögð - kristileg. Það var því engin furða þó hann einnig væri ástríkur ekta maki, elsku- og umhyggjusamur faðir og húsfaðir. Reglu- og stjórnsamur á heimili. Það vinvandur og vinfastur, góðgjarn og velviljaður öllum. Þrautgóður í þjáningum og sjúkdómi þeim er lengi þjakaði honum og loks leiddi til bana. Hvessu honum var annt um að efla guðs dýrð, varanlegan sóma sjálfs síns og sinna meðbræðra. Tímanlega og andlega farsæld. Sést ljósast  af því að hann sparaði hvorki krapta sína eða efni til að fá því framgengt að þetta musteri guðs, sem bein hanns hvíla nú hjá, væri reist með traustleik og fegurð, að sem veglegast yrði. Þannig minnast með skyldugu þakklæti, en sárum söknuði, sofnaðs ástvinar, nágrannar hanns og aðrir náungar."

Aðrar upplýsingar

Ártal
1858
Efni
Safnnúmer
Safnnúmer A: MA Safnnúmer B: 1948-360
Stærð
59 x 5.5 x 75 cm Lengd: 59 Breidd: 5.5 Hæð: 75 cm
Staður
Staður: Eiríksstaðir 1, 701-Egilsstöðum, Múlaþing
Sýningartexti
Grunnsýning 1996: Minningartafla frá Eiríksstöðum á Jökuldal. Gunnlaugur Þorkelsson var fæddur á Eiríksstöðum á Jökuldal 12. maí 1787. Hann var bóndi á Eiríksstöðum í yfir fjörtíu ár en vann einng við smíðar og sem meðhjálpari. Gunnlaugur gerði fyrstur hérlendis kynbætur á fé sínu, sem svo vel heppnuðust að bændur í Múlasýslum og Þingeyjarsýslu sóttu til hans hrúta til að bæta sauðfjárkyn sín. Hinn kynbætti sauðfjárstofn Gunnlaugs var fyrst nefndur Eiríksstaðafé en er hann hafði útbreiðst var hann nefndur Jökuldalsfé. Nokkur saga liggur að baki nafni Gunnlaugs en hann var skírður tveimur dögum eftir fæðinguna. Meðal skírnarvotta var föðuramma Gnnlaugs, Sólveig Þorkelsdóttir. Hún var ung heitbundin Gunnlaugi Árnasyni, sem drepinn var af óvættum, að talið var á jólum árið 1749. Gunnlaugur þessi er sagður hafa verið hinn mesti myndar- og efnismaður. Ætla má að þetta hafi orðið Sólveigu sár harmur og ekki gleðileg jólin 1749. Sólveig eignaðist son árið 1766 sem skírður var Gunnlaugur. Hann deyr úr bólusótt um jólin 1786 tvítugur að aldri. Á næstu vordögum þann 12 maí 1787, fæðist drengur á Eiríksstöðum. Foreldrar drengsins eru Þorkell, sonur Sólveigar Þorkelsdóttur, og Hróðný Pálsdóttir. Drengurinn er skírður Gunnlaugur en eins og getið er um hér að ofan var Sólveig föðuramma hans meðal skírnarvotta. Þá má hugsa sér að blendnar tilfinningar hafi bærst í brjósti ömmunnar við þessa athöfn. Á minningartöflunni er Gunnlaugs Þorkelssonar minnst.
Aðfangategund
Undirskrár
Undirskrá: Almenn munaskrá
Efnisorð / Heiti

Upprunastaður

65°7'27.8"N 15°25'49.5"W