Til baka í leit
Veistu meira?

Sprotabelti

1911
Varðveitt hjá
Þjóðminjasafn Íslands
 Sprotabelti (stokkabelti með sprota) úr 14 karata gulli með loftverki. Það er stimplað ME 14K EM á hvern stokk og á parasylgju. Upphafsstafirnir eru stafir feðganna Magnúsar Erlendssonar og Erlends Magnússonar en þeir ráku silfursmíðaverkstæði saman og stimpluðu flesta gripi með smiðsstimplum þeirra beggja. Á bakhlið beltisparanna er ártalið 1911. Það hefur því að líkindum verið Magnús sem smíðaði beltið því Erlendur lést árið 1909. Nema að smíðin hafi hafist löngu fyrr, þ. e. fyrir andlát Erlendar, og þeir feðgar báðir komið að smíðinni. Hið aldagamla handverk, loftverkið, hafði tapast niður í tímans rás en Erlendi hafði áskotnast beltisstokkur með loftverki. Hann rakti stokkinn upp og fann þannig út með hvaða hætti hann gæti smíðað gripi eftir honum. Beltinu fylgir ílangur, póleraður viðarkassi, fóðraður, sem beltið var geymt í. Á lokinu eru upphafsstafir Margrétar Þorbjargar Jensen og dagsetningin 21.5.1911, inngreypt með gylltum stöfum. Sjá einnig sprotabelti nr. Þjms. 2012-13-7. Síðar hafa fleiri smíðað skart með loftverki.  Allir gripirnir númer Þjms. 2013-33 eru hlutar sama skautbúnings úr eigu Margrétar Þorbjargar Kristjánsdóttur Jensen. Búninginn og skartið lét Thor Jensen sauma og smíða handa eiginkonu sinni fyrir silfurbrúðkaup þeirra, 21. maí 1911. Þau höfðu gift sig 21. maí 1886 og var brúðkaupið haldið í Krosshúsi á Akranesi. Á silfurbrúðkaupsdaginn voru þau búsett að Fríkirkjuvegi 11 í Reykjavík. Á þessum 25 árum höfðu þau eignast öll sín 12 börn, sem öll nema Lovísa komust til fullorðinsára. Margrét Þorbjörg var ættuð frá Hraunhöfn á Snæfellsnesi en þau Thor kynntust á unglingsárum á Borðeyri. Gefandi er dótturdóttir þeirra hjóna. Hún ber bæði nöfn ömmu sinnar og því kom búningurinn í hennar hlut. Gullskartið sem fylgir búningnum er einstakt sinnar tegundar og aðeins eitt sambærilegt búningaskart er til, svo vitað sé. Það var smíðað fyrir Alexandrínu drottningu fyrir heimsókn hennar til Íslands árið 1921. Það skart smíðuðu Jónatan Jónsson og Árni B. Björnsson.

Aðrar upplýsingar

Ártal
1911
Efni
Safnnúmer
Safnnúmer B: 2013-33-3
Aðfangategund
Undirskrár
Undirskrá: Munasafn
Efnisorð / Heiti
Efnisorð: Sprotabelti